CEBU, Philippines - Gihimo na kagahapon ang kasal sa legendary singer nga si Freddie Aguilar ug sa 16 anyos niya nga girlfriend nga ginganlan og Jovie.
Si Maguindanao Governor Esmael "Toto" Mangudadatu maoy nagkasal sa duha ug kini gibase sa Presidential Decree 1083 o Muslim Family Code of the Philippines.
Kini nahitabo gumikan sa pagbalhin sa relihiyong Islam sa 60 anyos nga singer nga si Freddie o Ferdinand Pascua Aguilar sa tinuod nga kinabuhi.
Sa maong balaod nakasuwat ang : "Any Muslim male at least fifteen years of age and any Muslim female of the age of puberty or upwards and not suffering from any impediment under the provisions of this Code may contract marriage. A female is presumed to have attained puberty upon reaching the age of fifteen."
Una na nga gipadayag ni Governor Mangudadatu nga sa wala pa nauyab ni Freddie ang maong menor de edad, nagpakita na ang legendary singer og interes nga magpa-convert sa Islam.
Kahinumduman nga nakadawat og daghang pagsaway gikan sa publiko ug nagkadaiyang sektor ang kalabot sa relasyon ni Freddie ngadto sa menor de edad ug samot na nga nisaysay ang singer nga gusto na niya kini nga pakaslan.
Kasamtangang nag-atubang si Freddie og kasong Qualified Seduction, o pagsupak sa Article 337 sa Revised Penal Code nga gipasaka ni Fernando Perito ngadto sa Office of the Prosecutor sa Quezon City.