Hugyaw nga Domingo mga SweetkaButanding! Domingo na usab ug sa mga nilabay nga semana daghan kaayo kitang naagian nga pagsuway. Gani, wala pa kita nakalingkawas sa linog unya naa pa si Yolanda ang bagyo nga grabe ang gibilin nga kadaut. Manghinaut ang inyong Yur's truly nga kining tanan atong makaya! Ipaambit nako ninyo ang kasinatian sa pagtubag sa GMA 7 Kapuso Foundation pagkahuman sa bagyong Yolanda.
Niaging Biyernes, didto ra ko nagbabag sa GMA Complex sa dihang naabot ang bagyo gumikan sa kusog nga uwan ug hangin kalit lang nga naglain ang akong lawas mao nga best in panghaplas ko ug tuod man nakagotch (nakatulog) ko sa lobby sa GMA Complex. Pero nakamata ko sa dihang nagkuso kuso na si Yolanda. Maayo na lang naa koy natago nga pagkaon nga gikan sa GMA canteen kay nag-panic utang man ko hahahahhaha! Unya pagkataudtaud nangutana ang among station manager kung okay lang ba nako nga mukuyog ko sa Bogo para mag GMA Operation Bayanihan ug sa walay pagduhaduha ni go sa go! Kauban ang abtik nga si Jayver Gica a.k.a Angelica ug si Mabelle Rusiana sa Kapuso Foundation in-charge dire sa Cebu among giadto ang lungsod sa Bogo.
Dili ana kasayon ang among pagpadulong tungod kay daghan kaayong mga kahoy sa kadalanan unya manimbalot ang imong balahibo sa imong makitang talan-awon sa dakong danyos nga gibilin ni Yolanda. Pag-abot sa gym gisugdan dayon namo ang pag apud-apud sa mga gipang pack nga hinabang.
Hugyaw ang akong gibati kay naka responde dayon mi pagkahuman sa bagyo. Makatandog ang ubang mga eksena sulod sa Bogo gym kay adunay mga bata nga naghilak, ang mga hamtong gipangtugnaw. Nibiya ang among team nga nanghinaut nga makaya nila ang tanan!
Pagkasunod adlaw tungod kay cancelled ang show, walay raket, kaysa mag nga-nga ko akong gigamit ang panahon nga mas maHugyaw kini. Nikuyog ko sa Kapuso Foundation Cebu kay motikang sila sa isla sa Bantayan para sa Operation Bayanihan. Pero wala man kami nakalabang anang adlawa mao nga didto kami nagpalabay sa kagabhiun sa usa ka resort nga no water no light nga kaming duha ni Angelica halos magBurlesk Queen matulog hahahhahahaha! Wala pud mi nakatulog kay nag Let's Fiesta ang mga lamok. Nilakaw mi nga alas kwatro sa kadlawon unya didto nami sa pier sa Hagnaya nagpaabot nga masakay na ang among six wheeler nga truck nga gisudlan sa mga goods ug ang GMA Service Van. Pagdunggo namo sa pantalan sa Santa Fe giuna namo og apud-apud ang mga goods sa lungsod sa Madredijos, Bantayan ug Santa Fe, wala nami nakasakay sa last trip, mao nga nag overnight na pud ang among team sa usa ka resort pero aning higayuna duna'y kuryente kay duna man sila'y generator.
Pag-uli namo sa Cebu bitbit nako ang kasinatian nga dili nako makalimtan sa tibuok nakong kinabuhi. Usa ka lola sa dihang nakadawat na siya sa iyang goods gikan sa taas nga linya kalit nitulo ang iyang luha ug niingon nga "Daghan kaayong Salamat!" Maayo na lang nga naka shades ko kay wala nako napugngi nga makaluha. Ang mga bata nga akong gipalinya unya sa ginagmay nga pamaagi akong gilingaw. Murag nag-awas awas ang akong kasingkasing sa kalipay. Sa mga gustong mutabang pwede kamo motawag sa 032) 2323723 (032) 2320353 sa GMA Channel 7 Cebu.
Dili kita magpakawa sa paglaum kay suma pa sa linya sa bag-ong kanta ni Julie Ann San Jose produced by GMA Network nga giulohan og "Pagbangon": "Walang kapantay man ang sakuna nating naranasan, wala ring kapantay ang tibay ng pusong Pilipino. Sabay -Sabay tayong babangon mula sa pagsubok. Walang maiiwan, isang bayan tayong aahon "