Padugang sa enerhiya

CEBU, Philippines - Dili malikayan nga dunay mga adlaw nga magmika o maluya ang imong lawas gumikan sa kadaghan ninyo nga gipangbuhat.

Pipila kanato ang mo-absent na lang sa ilang trabaho gumikan kay dili na madala ang kakapoy.

Normal lang ang bation ta og kakapoy, apan  dunay mga simple nga pamaagi aron mobalik ang saktong enerhiya sa atong lawas.

Usa na niini ang pagkaon og brown rice kung diin abunda kini sa manganese busa segurado nga mahanaw ang kaluya sa imong lawas.

Moabtik pud ang imong lawas kung mokaon ka og kamote gumikan kay napuno kini sa carbohydrates, Vitamin A ug Vitamin C.

  Tilawi usab  ang kalami sa honey ug ang resulta niini susama ra  nga niinom ka og energy drink apan ang naka-hugyaw niini mao nga minos ang glycemic index, busa  natural nga tam-is ang inyong matagamtaman busa maayo gyud kini sa  lawas.

Siyempre, ang labing sayon nga buhaton aron molagsik ang lawas ang pagkaon og bisan unsa nga prutas. Usa sa  mga prutas nga makahatag og taas nga enerhiya  mao ang saging nga abunda sa fiber ug ayaw usab kalimti ang prutas nga napuno sa potassium, ang orange nga sayon ra pangitaon sa mga tindahan.

Segurado usab nga maabtik ang imong lawas pinaagi sa pagkaon og spinach ug beans nga dunay protein  ug complex carb nga makadugang sa enerhiya sa lawas.  (Anden Miles , taho gikan sa http://www.womansday.com)