Ang mga Saduseo dili motuo sa kabanhawan. Mao nga agi’g kantalita ug bugal-bugal ilang gihimo nga kasangkapan ang balansayon sa Levirate Marriage diin ang biyuda sa namatay ang kinahanglang pangasaw-on sa igsuong lalaki sa namatay aron sila makapanganak sa ngalan sa namatay. Apan gitataw sa atong Ginoo nga sa kabanhawan dili na isyu kun si kinsa siyang asawa sa pito nga nakapangasawa kaniya.
Kini tungod kay ang kabanhawan kahimtang sa kahimayaan. Daw sama na sila sa mga anghel ug wala na sa hunahuna ug tinguha nga sila magminyo pa. Dugang pa, gitataw ni Jesu-Kristo nga ang Dios, Dios sa mga buhi ug dili sa mga patay.
Tungod niini mahinungdanon kaayo nga atong ipunting ang atong pagtuo sa nabanhaw nga Ginoo.
Nga imbis atong kalisangan ang kamatayon ato kining pangandaman uban ang buhing pagtuo nga ang Dios dunay giandam nga mas hingpit pa sa atong nasinati ning kalibutana. Mamahimo gihapon kitang immortal ug buhi sa kanunay pinaagi sa atong mga buhat nga maayo. Himuon natong masinati ang Langit dinhi sa yuta pinaagi sa pagsalamin sa Diosnong gugma ug kaayo ngadto sa uban.