CEBU, Philippines - Ang una gyod unta nakong gi-schedule atong Martes, Oktubre 15, mao ang pagpamyesta bisan asa sa dakbayan sa Talisay. Kun dili ko pakan-on ni Aly Lastimosa, adto ko’s ilang maam Malou Cabahug. Dili pa gani ko pakan-on ni Mam Malou, adto na lang gyod unta ko’s ilang City Councilor Danny Caballero or sa ilang sir Ehpoy Caballero. Kay kun moadto ko, bisa’g hain nila, seguro man kong pakan-on sa ilang asawa, bisa’g wa sila kay tried and tested na man nako ang ilang hospitality. Pero ang problema lang, kay nanawag si Rogelio de Caprio Banderas Affleck Serna [ug for sure, nasayod na sad mo’g kinsay Mat Damon, no?], ug pakuyogon mi’s promo diva sa airport, aron sugaton sila si Bea Alonso, Guji Lorenzana, Liza Soberano and most probably, Enrique Gil. Giingnan nako’s Roger nga kun dili segurong makakuyog si Enrique Gil, adto na lang ko’s una nakong plano. Nasuko ma’s Roger, niingon na lang ko, paninguhaon nakong makapauli’g sayo, ug adto na lang ko’s presscon nga adto himuon sa Castle Peak Hotel. Pero actually, nanawag na lang ko nilang sir Danny ug sir Ehpoy, nga dili ko mahinayo’g pamyesta, kay motambong ko’g presscon. Unya, nagpa load kong daan, aron kun magsige’g text si Roger, maka-reply ko. Ug pag-abli nako’s akong newsstand, aron magpadayo’g atiman sa mamalit og newspaper, OMG!Nikurog ang akong malapalasyong tahanan! LINOG! Kusog kaayo. Migawas ko, ug nanggunit sa mga railings sa daplin sa karsada. Then pagsubside, mi-text gyod si Roger ug nagpahibawng kansel ang presscon. For sure, ang hinungdan mao ang killjoy kaayong linog. So, kalma na lang kaayo ko. Then, naligo. Pero wa pa gani ko mahuma’g kaligo, miabot si Roger. Kay makigpanuroy ang promo Diva. Manan-aw’g unsay nahitabo sa palibot. Pero naabot mi’s Zubochon sa Escario, ug nangaon. Pero paghuman pa gyo’g pangaon, namalhin mi’g usa ka lugar aron kono mag-coffee. Dugay kong naka-decide unsay orderon. Nang-reklamo man ang akong mga kauban nga poor kaayo’g service, as in, 96 hours una moabot ang ilang order, wa na ko mo-order. Total, inigpauli nako, duna ko’y tulo ka klase nga coffee, ana lang, Ana Mariz Igpit.