Bayot si Ryan sa MHL?

CEBU, Philippines - Namantala sa www.fashionpulis.com kagahapon kining hulagway ni Ryan Agoncillo, apan walay detalye ngano ug para unsa kini? May mga nagduda nga publicity picture kini para sa cameo role ni Ryan sa GMA-7 toprating primetime series nga “My Husband’s Lover” nga hapit na mahuman.

Kahinumduman nga nabalita sa Banat News Hugyaw adtong Domingo nga adunay cameo role si Ryan sa maong teleserye. Giasoy niya nga gamay ra kaayo ang iyang role sa finale sa maong serye, diin kun mamilok matud pa ang mutan-aw, dili na siya igkita. Apan niya pa, dako kaayo og impact ngadto sa characters sa tulo ka bida nga sila si Vincent (Tom Rodriguez), Carla Abellana (Lally) ug Eric (Dennis Trillo) ang iyang role.

Gitug-an usab ni Ryan nga gipaningkamutan gyud sa iyang management nga mahusay ang iyang schedule, aron lang gyud makaapil siya sa maong teleserye nga matud pa niya gihisgutan og maayo sa publiko, sa nagkadaiyang social networking sites ug sa mga opisina ug panimalay.

June Macasaet tangtangan sa korona?

Lanog kaayo karon didto sa kaulohan ang isyu mahitungod sa planong pagtangtang sa Prime Events Productions sa korona ni 2012 Mr. Manhunt International June “Junemac” Macasaet. Tungod, matud pa, kini sa pagdumili ni Junemac pagpirma sa kontrata ubos sa maong produksyon.

Ning bag-o lang, mipagawas ang Prime sa ilang press statement nga nagkanayon nga dismayado sila sa gibuhat nga pag-snob ni Junemac sa ilang kontrata, maoy hinungdan nga mi-pull out ang uban nilang mga sponsor. Tungod niini, ilang hulipan si Junemac sa iyang first-runner up nga si Chris Edwin Navarro, gawas nga dili nila ihatag ang iyang nahibiling premyo.

Apan wala matarog si Junemac sa maong bahad ug mitawag niini nga usa ka harassment batok kaniya. Giklaro sa founder sa Manhunt International Organization nga si Alex Liu nga walay katungod ang Prime Events pagbuhat niini sanglit dili sila ang franchise holder dihang misalmot ug nakadaog si Junemac sa miaging tuig.Midugang pa si Liu nga ang MIO lamang ang dunay dakong gahum sa pagtangtang sa usa ka mananaug subay sa ilang patakaran, apan wala sila’y nakitang igong rason aron buhaton kini nila kang Junemac. “Prime has no right to dethrone you and only Manhunt International Organization can do that and that would embarrass them (Prime Events) and the whole organization,” nagkanayon si Liu sa iyang text message ngadto kang Junemac.

Gikalipay ni Junemac ang pagdapig kaniya sa MIO. Atol sa press conference nga gipatawag sa Psalmstre Enterprises alang kaniya isip endorser sa New Placenta for Men, iyang gipasabot nga ang pagbalibad niya sa pagpirma sa kontrata gumikan sa iyang pagtahud ug pag-ila sa iyang mentor nga si Mervin Alvaran, ang kanhi franchise holder sa Manhunt Philippines. Dili niya, matud pa, ikabaylo ang suporta kaniya ni Alvaran dihang mirepresentar kini sa Pilipinas sa Mr. Manhunt International competition sa Thailand sa miaging tuig. Si Junemac ang labing unang Pilipino nga nakadaug sa maong bangga. Giangkon usab sa ulitawo nga lakip sa nakatabang kaniya mao ang iyang higala nga si Jim Acosta, ang founder sa Psalmstre Enterprises.

Mapasalamaton si Junemac sa iyang mga supporter tungod kay wa siya talikdi niini ning panahon sa pagsuway. Iya usab gikalipay ang mga positibong epekto sa maong isyu tungod kay nagkadaghan ang iyang mga runway ug print project ug ingon man endorsement offer. Usa na niini ang pag-endorso sa New Placenta for Men. Ug nganong siya ang napili ni Jim Acosta nga mo-endorso sa New Placenta for Men? “JuneMac is our ideal product endorser for he exemplifies the men of today…relevant, confident, and honestly respectable, no amount of harassment can take away the honor JuneMac has given our country. Dethronement or not, we remain behind him,” padayag ni Acosta... Ni Ricio Rich M. Salibay

Bukas ang Banat Hugyaw alang sa habig sa Prime Events. Ang among email address mao kini: [email protected]

Pahayahay sa Amerika

Nakauyab na ang aktres nga si Bianca King ug dili kini taga showbiz. Nagbakasyon karon ang duha didto sa Amerika ug todo post ang aktres sa ilang mga hulagway sa Instagram.

Rhian mitin-aw sa isyu

Giklaro ni Rhian Ramos nga wala’y problema tali nilang duha ni Marian Rivera kinsa girlfriend ni Dingdong Dantes nga leading man niya sa seryeng Genesis sa GMA-7. Kahinumduman nga na isyu niadto nga nagselos si Marian sa dihang nagpares sila si Dingdong ug Rhian sa Pinoy remake sa Stairway To Heaven.”For me, there was never a problem. I guess we‘re okay,” Tsika pa ni Rhian ngadto sa Pep.ph.

Suwerte nga buwan

Tsika pa ni Dingdong Dantes nga gisuwerte ang iyang career karong buwana gumikan kay duha ka mga dagkong proyekto ang malantawan sa publiko.  Nasayran nga magsugod karong October 14, ang serye niya nga Genesis, samtang karong October 16 usab ang playdate sa pelikula nila ni Bea Alonzo sa Star Cinema nga She’s the One. Mo-guest usab ang Kapuso actor sa programang Gandang Gabi Vice sa ABS-CBN.

Adarna

Nag-ulohan og Adarna ang upcoming teleserye ni Kylie Padilla sa GMA 7. Excited na si Kylie gumikan kay sunod buwan na ang airing niini.

Sisiw extended

Nagmaya pag-ayo ang mga bituon sa seryeng Mga Basang Sisiw sa GMA-7 gumikan kay extended kini sa kahanginan. Wala hinuon matino  pila ka semana  ang lugway  apan gitataw sa GMA nga ang maayo nga dagan sa ratings maoy rason niini. Nalakip sa maong serye sila si Kongresista Lani Mercado, Raymond Bagatsing, Mike Tan, ug Maxene Magalona.

Marian todo bantay?

Gihimakak ni Marian Rivera ang nigawas nga mga istorya nga matud pa nagsige siya og duaw sa set sa pelikulang She’s The One nga gibidahan sa iyang uyab nga si Dingdong Dantes. Nagkanayon ang aktres nga puwerteng niyang bisiha busa imposible kaayo  ang maong taho.

Friends ra gyud

Gipasidan-an si KC Concepcion sa iyang mga higala nga kinahanglan nga kutob ra gyud sila sa panaghigalaay sa Houston Rockets rising star  nga si Chandler Parsons nga ka-date sa  aktres  niadtong Martes sa gabii.Giingong uyab ni Chandler ang sports journalist nga si Robyn Crowley.

Goodbye pictures

Gidedma lang ni Cristine Reyes ang mga nisaway kaniya human sa breakup nila ni Derek Ramsay. Gianam-anam na og tangtang sa aktres ang mga hulagway nila ni Derek sa iyang Instagram account.

Pag-amping sa imahe

Wala gyu’y plano si Charee Pineda nga mo-pose sa men’s magazine gumikan kay dili siya komportable nga ibandera ang iyang lawas. Giampingan usab ni Charee ang iyang imahe isip konsehal sa Valenzuela City.

Big concert ni Anne

Gipahibalo ni  Anne Curtis nga duna na pud siya’y umaabot nga big concert  sa unang bahin sunod tuig. Gisugdan na usab karon og trabaho ang umaabot niya album. Kahinumduman nga kanunay nga hugopan sa mga tawo ang mga nangagi nga konsyerto sa aktres nga nag-ulohan og Annebisyosa.  

December gipili sa Melason

Gibutyag nila ni Jason Francisco ug Melai Cantiveros nga final na ang ilang hukom nga karong December sila magpakasal didto sa General Santos City. Tua karon ang duha sa GenSan kay nag-proseso sila sa mga papeles. Nitambong na usab sila og seminar sa Population Commission.

Dili matag-an

Tsika pa ni Edgar Allan Guzman nga nag-uros uros gyud ang iyang kalipay sa relasyon nila ni Shaira Mae dela Cruz apan aminado  ang aktor nga dili pa gyud siya makaingon nga mao na kini ang katapusang babaye sa iyang kinabuhi. Suma pa ni Edgar nga dili gyud matag-an ang dagan sa panahon.

Lea nawili sa The Voice

Nanghinaut si Lea Salonga nga dili ma-conflict ang iyang schedule sa mga proyekto niya sa laing nasud sa ikaduhang season sa “The Voice of the Philippines”. Interesado gihapon ang singer nga mahimong coach sa maong programa aron daghan siya og matabangan nga aspiring singers.

Beach wedding

Nagpanikad na si Jericho Rosales sa plano nila nga pagpakasal sa iyang girlfriend nga si Kim Jones sunod tuig. Matud pa ni Echo nga beach wedding ang napilian nila ni Kim nga konsepto alang sa maong espesyal nila nga adlaw.

Bitbit sa anak

Dali nga mingawon si Yasmien Kurdi   sa iyang anak busa iyaha kining dalhon usahay sa set sa iyang mga programa sa GMA-.7. Gipaniguro hinuon sa aktres nga dili kini makabalda sa iyang trabaho.

MMK nominado sa Emmy Awards

Nominado sa International Emmy Awards ang labing dugay na nga drama anthology sa Pilipinas nga makita sa ABS-CBN, ang “Maalaala Mo Kaya” .

Makatigi sa MMK sa Drama series category ang mga programang   “Les Revenants” sa France, “Next in Line” sa Brazil ug  “Accused” sa  United Kingdom.

Usa sa nagmaya pag-ayo sa maong taho ang host sa MMK nga si ABS-CBN President Charo Santos-Concio.

Ang 2013 International Emmy Awards himuon  karong  November 25, didto sa  New York.