Atik-Atik ni Kris?

VATSKI: Maayong adlaw, Gar, ug sa tanang mga loyalista sa Banatanay! It’s nice to be back! Sige lang ta ani’g absent, Gar, I wonder why? Hahaha! Anyway, lately nakabantay ko nga mura’g nag-field nalang ni pirmi si Kris Aquino para sa iyang Kris TV sa ABS-CBN. Naa’y time nga mosakay siya sa MRT, taxi, jeep ug uban pa. Unya, naa pud to’ng episode nga nangumpra siya sa usa ka public market. Unsa naman ni, Kris, pangampanya? Kasayo ba. Daan naman ni’ng namulong si Kris nga molangsad gyud siya. Gani wala man niya gi-deny sa diha’ng gipangutana ni siya kung senador ba iyang langsaran. Possible gyud kay sikat biya siya. Nidaug gani si Bam Aquino nga apelyido ra’y puhunan, siya ba kaha nga bisan bata nakaila naman niya. Pero ang ako lang ba, gigamit gyud niya iyang gahum sa TV alang sa iyang political dreams. Gamit na gamit gyud sa Tagalog pa. Mao na’ng magtan-aw ko’ng Kris samtang nakighimamat sa mga pasahero sa MRT, makaingun gyud ko: “Atik!” Atik bitaw kaayo. Kris Aquino, mosakay og MRT? Samot na’ng makigchikachika sa mga pobre.

GARRY: Kumusta Vatski ug sa atong readers sa Banatanay. It’s nice to be back again. Wala man ‘ko’y nakitang dautan sa pagsakay ni Kris ug sa ubang artista sa MRT. Para kang kinsa man diay ang MRT? Apil man ang adunahan ug pobre niini, di ba? Kung gimik ba or dili sa mga artista, keber na ta niini kay ang importante nga unsa matang sa transportasyon nga atong masakyan aron maabot ta sa atong destinasyon, atong buhaton. Dili na nimo ikasakit Vatski iyang pagsakay kay bisan ikaw, kung mosakay ka og helicopter or train, keber basta moabot ka sa imong sangputanan.

  VATSKI: Ambot lang, Gar, basta para nako obvious kaayo nga plastikan lang ang show. Sama ra gyud na si Kris kang Kim Chiu nga obvious pud kaayo nga wa malipay sa iyang gibuhat. Naa to’y usa ka episode diin nagsakay sila si Kris sa MRT, unya samtang nakig-istorya si Kris sa usa ka pasahero tapad ni Kim, ang Sugbuanang actress, nga wap-a gyud ko makadungog magbinisiya, gitago biya gyud niya iyang kamot hadlok makahikap sa iyang tapad. Klaro kaayo ang discomfort ni Kim, nga kung pwede pa lang mag-alcohol na dayun siya kay mura siya’g gihugawan. Sama ra gyud siya ni Kris nga nagpakaaron-ingnun. Maayo pa sa studio na lang mo, unya laing tawo na lang inyung pasuruyon.

Anyway, daghang salamat diay sa atong mga loyalista nga dili gyud malimot og basa sa Banat News Hugyaw, hilabi na sa among silingan sa Poblacion, Talisay City, nga sila si Arlene ug Bebot Angcon, nga dili gyud mosipyat mopalit og  Banat News kada adlaw kay favorite man nila si Ryan Mark (kaHUGYAW! Salamat..editor). Bongga atong editor, Gar, daghan na’g fans. Ug syempre ang mga loyalista pud nato diha sa Barangay Tejero, Cebu City diin konsehal akong partner nga si Garry Lao, maayong adlaw kaninyo diha. Ayo ayo mo.

Garry: Naa ra man sa huna-huna sa tawo nga nagtan-aw kung plastik ba or dili. Ang labing importante sa tanan nga ang imong gibuhat, nalipay ka ug wala ka’y gipasakitan. Dili unta hatagan og kolor, Vatski sa mga tawo ang pagsakay sa MRT. Imagine, Vatski, kung wala’y MRT unya magsakay sila og jeep or ilang sakyanan nga pwerte man trapika sa Manila? Mangita ka og pamaagi asa ka madali. Kung feel sa atong mga artista og pagsakay, go for it. Dili man siguro maka-ubos sa standing sa ilang pagka-artista ang ilang pagsakay, di ba!?

PANGUTANA: Unsay reaksyon nimo niining pagsakay-sakay ni Kris og MRT o pakighugoyhugoy sa  masa? Ngano man? Ipabuhagay ang imong opinion pinaagi sa pagpadala niini dungan sa imong ngalan ug address ngadto sa: 0932-851-0402. Kutob lamang karong 12 noon, October 7, ang pagdawat nato sa inyong mga reaksyon, busa text text text na!