Hugyaw nga Domingo mga SweetKaButanding! Hugyaw kung Hugyaw ang akong ipaambit kaninyo kabahin sa mga dakong shows nga nahitabo sa mga niaging semana kauban ang inyong Kapuso Network. Una, nagKapuso Promo Tour ang Binoy Henyo sa Gaisano Grand Mall Dumanjug. Asa mo ana? Bisag medyo layo ang maong mall apan ang cast sa Binoy Henyo (bag-o lang kini nahuman) nga silang Lucio Ayala, Gwen Zamora, Luis Alandy ug Sheena Halili nakatikang gyud. Dako kaayo og suporta ang mga taga Dumanjug kay sayo pa lang sa buntag mintras nangandam pa mi naa na sila. Nagpahipi lang sa mga dagkong kahoy ug sa dihang duna na'y mga lingkuranan. Tua ra! Naghinayhinay na sila'g panglingkod ug kalit na kining napuno. Malipayon kaayo ang inyong Yur's truly kay sa unang higayon nakauban nako ang akong bag-ong co-host sa mga regional shows para sa Central and Eastern Visayas ang 2012 Miss World Second Princess nga si Vanessa Ahmann. Nakita nako ang potential ni Vanessa sa pag-host kay babaon man kaayo ni, walay problema sa mga pinulungang English o Bisaya kay mura’g nakakaon og sabon magbuwa-buwa lang. Pero gamay nga praktis sa pinulungang Tagalog. Go na! Maayo usab ang among tandem. Gani, na shock na lang siya og kalit sa akong mga adlib kay duna ko'y gipahalok nga audience niya. Nalingaw ra pud si Van (mao ang akong tawag niya). Mao nga I'm looking forward pa nga makatrabaho pa siya. Pagkakaron, tua pa sa gawas sa nasod si Van mao nga sunod buwan watch out kay mas visible na siya sa mga mall show ug sa mga GMA shows.
Sa laing bahin,nitikang na usab kami sa Argao, Cebu pero sa wala pa ang among SK Kapuso Night adunay gipahigayon nga medical mission ang Kapuso Foundation, nag-feeding, medical, dental ug optical Mission sa Barangay Taloot. Usa kini ka adlaw nga Serbisyong Tinud-anay.Sa mga gusto magpaambit sa ilang mga donasyon tawag lang sa 0923 9095972 pangitaa lang si Ms. Mabelle Rusiana. Pagkasunod ugma niana, mao dayon ang among SK Kapuso Night kauban silang Steven Silva, Bianca King, Rhian Ramos ug Christian Bautista. Napuno sa pakpak, singgit ug katawa ang PDMSCC Gym, Argao, Cebu. Unang nihalad og kanta kay si Steven Silva ug kahibalo nako ang dakong kalipay ni Gleven kay naa ang iyang all time crush, pagkahuman sa duha ka kanta kay nagduwa kami kauban si Steven plus duha ka mga dalaga nga gikuha namo sa audience. Unsa ba pagkahitaboa nga sa dihang nangita nako sa props wala'y Gleven nga nilugwa kay tua man niya ang lipstick nga maoy gamiton sa duwa. Ngano kaha? Nauwaw ba siya? Wala diay. Nag-briefing diay siya sa ubang artista. Hahahahhaha! Niuli si Steven nga wala intawon sila kabonding si Gleven. Wala man siya naguol kay abtik kaayo nakapahulagway ni Steven ang akong darhl Gleven Silva-Ignacio- Tiuseco! Gisundan kini ni Bianca King, Rhian Ramos ug siyempre ang King of Balladeer murag nagmini concert si Christian Bautista. Mabulukon ug malampuson ang SK Kapuso Night.
Pagkasunod adlaw, nia na ang mas challenging part kay nabalik mi sa Dakongbato Resort sa hotel kami ni Gleven ug Angelica, alas dos na sa buntag unya mimata mi og alas kwatro y medya sa buntag kay call time para sa shooting sa Let's fiesta kay alas singko sa buntag. Hinuon, makalingaw ang among gi feature kay sa ikaduhang adlaw sa among shooting didto man mi og whale shark watching, nihapit mi sa simbahan sa Boljoon, unya naniudto sa Alcoy, Cebu, last stop namo ang Coal Mountain Resort. Mao nga pagbalik namo sa Cebu City, ang akong concert pagkaHugyaw na man lang, ga blending mi ni Gleven (og hagok), gamit sad kaayo ang among hagok kay wala nagduka si Kuya Renante nga among driver. Hahahahhahaha!
“Paghinumdum†karong hapon
Agi’g pagpasidungog ug pagtamod sa mabulukong musika nila ni Maestro Mil Villareal ug Queen of Visayan Songs Susan Fuentes, usa ka "by- invitation only musical tribute" ang ipahigayon sa magtiayong Jose 'Dodong" and Nena Gullas diha sa Jose R. Gullas Halad Museum karong alas kwatro sa hapon.
Kini giulohan og "Paghinumdum, a musical tribute to Cebu's Maestro Mil Villareal and Queen of Visayan Songs Ms. Susan Fuentes."
Sa interview sa magtiayong Gullas nga namantala sa The Freeman Entertainment kagahapon, ilang gilab-as ang ilang pagkahugyaw sa musika ni Susan, kinsa mipanaw niadtong September 7, gumikan sa kumplikasyon sa iyang gihambin nga colon cancer didto sa National Kidney and Transplant Institute sa Quezon, City.
Gipaambitan ni Mam Nena nga sinati kaayo siya sa mga kanta ni Susan, gumikan kay nagtubo siya nga kanunay nga maminaw niini sanglit kanunay kini nga ipatukar sa iyang mga ginikanan. Labing paborito niya ang awit nga " Nahisulat sa Hangin."
Nalakbitan usab sa artikulo nga 2009 pa, dihang gibuksan sa magtiayong Gullas ang JRG Halad Museum nga nahimutang diha sa cor. V. Gullas ug Jakosalem Streets, niining dakbayan, dihang ilang gisugdan ang pagpangita kang Susan, human usab kini nawagtang nga daw bula gikan sa pagrayna niini sa Kabisay-an ug Mindanao.
Gipadayag ni Mam Nena nga nagpatabang sila sa mga inila usab nga mga Sugbuanong Diva nga sila si Pilita Corrales ug Dulce pagpangita kang Susan, kinsa ilang nahibaw-an nga mibubo na sa iyang panahon sa pag-alagad sa Ginoo.
Ug tuod man, ang lumad nga taga Butuan, City nahibalik gayud diri sa Sugbo human usab sa mga paningkamot nila ni Sir Dodong ug Mam Nena. Nanghinaot si Mam Nena nga ang kamatayon ni Susan wala magsimbolo sa inanay na usab nga pagkawagtang sa Bisayang musika.
Gipadayag niya nga sakit matud pa nga palandungon nga ang mga batan-on karon mga awit na gikan sa Amerika ang gisag-ulo, mga awit nga dili maisip nga musika kun dili puros lamang saba-saba. Dugang niya nga sakit pud nga bation nga wala na nato hatagi og bili ang atong kaugalingon musika ug giisip pa sa uban nga baduy, samtang ang mga langyaw nahugyaw ug labihan nga makaabiba sa kamabulukon ug kaanindot niini.
Kataw-anan
Gikataw-an ni Aicelle Santos ang pagkalambigit niya sa panagbuwag nila ni Gian Magdangal ug Sheree. Giangkon niya nga suod gyud sila ni Gian apan kutob ra matud pa diha. Gitambagan niya ang singer nga mag-ampo taliwala niining sitwasyon nga iyang giatubang karon.
Mental torture
Giklaro ni Gwen Garci nga wala siya dagmali sa iyang kanhi live-in partner nga Italian chef pero "mental torture" para kaniya ang "verbal abuse" nga iyang nahiaguman. Nakigbuwag matud pa ang chef ngadto kaniya gumikan kay buot niining mag-enjoy pa sa iyang kinabuhi. Gisalikway ni Gwen ang pasangil niini nga materialistic siya gumikan kay wala matud pa siya’y gipangayo gikan niini nga mahalong mga butang. Mipauli na si Gwen dinhi sa nasud dala ang iyang anak.
Wala mulambo
Parehong giangkon nila ni Heart Evangelista ug Sid Lucero nga may panahon kaniadto nga nagkasuod sila ug nagdate-date gyud, apan wala matud pa kadto mulambo. Pagkakaron managhigala sila ug gipadayag ni Heart nga happy na gyud siya sa kiliran ni Senator Chiz Escudero.
Best drug
Gipaabot nga makontrobersyal na pud si Miley Cyrus sa iyang interview sa Rolling Stone Magazine. Namahayag ang kontrobersyal nang daan nga singer nga ang weed o marijuana matud pa "is the best drug on earth."
Wa kasabot
Gipadayag ni Carla Abellana ang iyang kalibog nganong humanon na ang ilang toprating teleserye "My Husband's Lover." Sa iyang instagram account siya nagkanayon nga samtang ang ubang teleserye gipaningkamutan nga mainat pa ang istorya, ang ila hinuon pamub-an.
Para sa mga naduslak sa gugma
Bisan sa ka kontrobersyal sa music video ni Miley Cyrus sa kanta nga 'Wrecking Ball" nagmatuod usab matud pa kini nga labihan ang kasakit nga natagamtaman sa singer human sa panagbuwag nila sa iyang fiancé Liam Hemsworth. Hinungdan nga karong gabii, tukion sa programang Kapuso Mo Jessica Soho sa GMA-7 unsay andam ug kaya nga buhaton sa tanang mga broken-hearted nga mga tawo.