Madaugong huni sa Sugbo

CEBU, Philippines - Tingog nga makapalimbawot sa balahibo ug maka-relax sa pamati, mao kini ang mga kalidad nga gidalit sa ilado na kaayo nga grupo sa mang-aawit nga Huni Sugbo nga gilangkoban nila ni Daryl Shane Leong, Wilson Po ug Benjie Layos.

Ang registered nurse nga si Daryl nisaysay dinhi sa Banat News Hugyaw (BNH) nga naporma ang ilang grupo niadtong 2011 human nangita ang composer nga si Eugene Tan og tulo ka mga lalaki nga singers nga maoy mohatag og kinabuhi sa gigama nga kanta niini nga entry sa Cebu Pop Music Festival.

Nasayran nga nahimong champion ang giawit nila sa Cebu Pop niadtong 2012 nga nag-ulohan og “Ulan” ug sugod niadtong higayona nikisaw na og maayo ang ilang pangalan.

“Sa wala pa naporma among grupo, lahi lahi gyud mi og tirada sa kanta, .pwede pop, si Benjie motira sad og classical ug magkasinabot mi ni Wilson sa standard,” nagkanayon si Daryl.

Positibo ang madawat nga reaksyon sa Huni Sugbo sa matag human nila og kanta sa entablado ug gipatuman nila ang hingpit nga disiplina sa tagsa-tagsa nila ka mga kaugalingon, sama sa dili pagpanigarilyo  ug hatagan og saktong pahuway ang lawas.

“Kinahanglan nga dili mag-abusar sa lawas  aron ma-maintain ang kanindot sa tingog,” dugang pa ni Daryl.

Giangkon sa maong grupo nga wala gyud sila nag-agi og formal nga training basta ang ilang technique mao ang pagpaminaw og tarong sa musika aron mahatagan nila kini og saktong emosyon ang kanta.

Nagkanayon si Daryl nga praktis ug trabaho ra gyud ang kasagaran nila nga routine sa ilang kaugalingon, apan mohatag pud sila og oras sa pagpanuroy nga nagdepende kung duna sila’y dakong oras nga bakante.

Matud pa niya nga matawag nga nindot og tingog ang usa ka tawo basta dili kini sakit paminawon sa dunggan.

“Hinuon depende ra man gud na sa tawo kung unsa ang iyang tirada, basta ang importante nga ma-deliver og tarong ang message sa kanta,” matud pa ni Daryl.

Dugang pa niya nga kinahanglan nga “flexible” ang singer sa tanang higayon ug kung duna man siya’y gipang-agian, dili damayon ang iyang performance sanglit ang paghatag og kinabuhi sa kanta nagdepende sa mensahe nga gidalit niini.

“Dapat ang usa ka singer andam sa tanang higayun nga itago usa ang unsa gyud ang iyang gibating personal kay kung mukanta na siya, angay ra niyang i -relay sa mga naminaw ang mensahe sa kanta, sa ato pa, dapat flexible ang emotions sa singer ,” hirit pa ni Daryl.

Panawagan usab niya sa katawhan nga kinahanglan nga higugmaon ang musika sa Pilipinas ug matud pa ni Daryl, nahimo na kini nga kabahin sa ilang kinabuhi.

Gipatigbabaw gyud sa Huni Sugbo ang pagsinabtanay sa usa’g-usa aron dili gyud mabungkag ang ilang grupo busa  wala gyud mahitabo sukad-sukad nga nagbikil ang mga sakop niini.

“Dili gyud mi anang away-away,  kay kung mag-abot mi, mag praktis ra mi ug mangatawa . Kung naay i-suggest ang usa, wala ray problema sa uban,” suma pa ni Daryl.

Giisip nila nga amahan si Eugene gumikan kay mao kini ang naghatag kanila og pangalan sa local music scene gumikan kay kanunay gyud sila kuhaon nga interpreter sa mga ginama niini nga kanta.

“Ana gyud nang mga amahan, paboran ang anak.hehe, tungod kay siya (Eugene) man gyud ang naghatag sa among pangalan. Siya gyud ang nagdala’g bida aning istoryaha,hehehe,” suma pa ni Daryl.

Kahinumduman nga ang Huni Sugbo maoy naghatag og kinabuhi sa ginama ni Eugene nga   “I'll Always Turn To You” sa Huniño: Huni Halad Alang kang Sto. Niño 2013 ug napili usab nga best interpreter ang nahisgutang grupo.

Gawas sa hugyaw nila nga tingog, aduna pud sila’y maayong choreography sa entablado sa higayon nga mo-perform ang ilang grupo hinungdan nga sipa nga pakpak ang ilang madawat kanunay gikan sa audience.

Samtang ang laing sakop sa Huni Sugbo nga si Wilson nisaysay nga bisan sa ka-busy niya, mogahin gyud siya og saktong oras sa pag-praktis ug pagbalanse ra gyud sa oras ang iyang sekreto.

Nagtrabaho si Wilson isip manager sa usa ka kompanya nga nagbase dinhi sa Sugbo.

“Mag tawganay lang me kung unsa me orasa ug adlawa available kaming tulo .Usually  makapraktis mi kay gabii na o ba kaha Domingo,” nagkanayon si Wilson.

Dugang pa ni Wilson nga giandam na nila ilang kaugalingon kung pananglitan makadawat sila og mga pagsaway.

“So far wala pa man ko makadungog og criticisms, kung naa man gani, smile na lang among itubag,  hehehe,” matud pa niya.

Samtang negosyante ang ikatulong sakop sa Huni Sugbo nga si  Benjie ug nag-sideline usab kini isip usa ka photographer.

Nagkanayon si Benjie nga wala gyud niya damha ang tanang kadaugan nga naangkon sa ilang grupo sa higayon nga mosalmot sila og kompetisyon ug tanan nila nga kalampusan, ilahang gihalad ngadto sa Kahitas-an.

“Dili gyud ko kalimot, katong panahon nga niapil mi sa 32nd Cebu Music Pop Festival. Wala gyud mi ato nagdahum nga makadaug mi as Best Interpreter and Grand Champion.  While gibasa na ang result sa mananaog, busy ra kaau mig chika-chika and katawa sa kilid nga among gibarogan. Pag- announce  gyud  sa winner kay wala mi reaction  kay abi namo lahi ang nakadaug. Nagsige  pami og lingi-lingi sa among likod kung kinsay mo- move forward nga-receive sa award. Gihapak na lang mi sa among mga tapad kay ang amo diay pangalan sa group ang gitawag nga mananaog,” saysay pa ni Benjie.

Gipadayag ni Benjie nga importante kaayo ang musika sa kinabuhi sa tawo gumikan kay dunay mga mensahe niini ang mahimong kapanaminan ug magsilbing inspirasyon sa tagsa-tagsa nato ka kinabuhi.