CEBU, Philippines - Anak siya sa usa ka kabus nga pamilya ug kanunay nga gitamay gumikan sa ilang kawad-on. Apan ang ilang kahimtang wala makahugno kaniya, hinunua, nadasig siya gumikan niini.
Pang Magpakailanman ang peg. Ang nasinatian nakong kalisdanan tungod sa among kakabus, magbaklay og pila ka kilometros molabang og dakong sapa kada adlaw padung eskwelahan bitbit tsinilas, pagkasakit sa akong amahan, kami sa akong inahan manuroy og isda, naay higayon nga mo-ob-ob (kaon) lang ko sa ice nga gibutang sa isda aron matambalan ang uhaw ug gutom labi na kun lagyo ang among maabtan. Labaw sa tanan ang pagtamay sa uban tungod lagi kay pobre man, kini ang nagtukmod nakong maningkamot," tubag ni Alan sa Banat News Hugyaw (BNH) sa pangutana unsa nga mga panghitabo kaniadtong bata pa siya ang dili niya malimtan.
Kinamanghuran siya sa siyam ka mga magsuon ug pag-ugmad sa umahan ang kabuhian sa iyang mga ginikanan. "Pasalamat ko sa akong mama Gaudencia sa tanan sakripisyo niya." Mauwawon matud pa siya, apan sa hilom nangandoy siya nga mamahimong radio announcer. Apan pagtekang niya sa kolehiyo, BS Biology ang unang kurso nga iyang gikuha. Hinuon mipatigbabaw ang iyang pangandoy, hinungdan nga mi-shift siya ngadto sa A.B. Mass Communications aron matud pa mabuntog ang iyang kamauwawon ug mabaid siya sa natad sa public speaking. Pagtapos niya sa iyang kurso nahimo siya nga news writer ug field reporter sa Bombo Radyo Cebu, dayon mibalhin siya sa dyLA ug MBC Aksyon Radyo (dyRC), ug lagi kay tinguha man niya makita sa telebisyon mi-apply siya sa GMA-7. Alegre ang love story niya ug sa iyang asawa nga si Gwen, kinsa admin officer kaniadto sa Aksyon Radyo ug karon anaa na sa Wild FM. "Twenty-nine years old ko naminyo sa kauban trabaho nga si Gwen. Kada agi nako sa iyang lamesa magsige ko ingon, Hi Ms. Beautiful! Mobawos pud siya: "Hello Mr. Newsman!" Nagkatakdo ang gugma nga namunga og usa, seven- years old na among baby Keizia ug four months preggy na pud siya sa among ikaduha."
Karon nga usa ka amahan, iyang gitudlo ngadto sa iyang anak ang iyang nakat-onan gikan sa iyang mga ginikanan kabahin sa "pagpatulo sa kaugalingong singot sa pagpaningkamot, dili mang agrabyado og tawo, ug labaw sa tanan maayong alagad sa Ginoo."
Seryoso Na Ni
BNH: Nganong matag tapos nimo sa Buena Mano muingon ka man gayud og "To God Be The Glory"? Unsay nagpahipi nga istorya niini?
Alan: Wala ko kong wala ang Ginoo, ang tanan nga naa kanako gikan Kaniya...sa tanan nakong gipangaliya wala Niya pakyasa lakip na ang kasamtangang trabaho sa GMA busa siya lang ang angayan pasidunggan...ingon ani ka hugot ang akong pagtuo sa Labawng Makagagahum. I always do my best not because I want somebody's recognition but because I want to glorify Him...To God Be The Glory!
BNH: Pagmata nimo pagka buntag human nimo nadawat ang imong pasidungog unsay imong gibati ug unsay unang misantop sa imong hunahuna?
Alan: Overwhelmed! Pero ang mas nakapatandog nako dihang akong nabasa ang request letter sa akong anak gipatong sa altar para ni Lord nga iyang gisuwat sa wala pa ang awarding diin iyang gipangayo nga ang iyang dada maoy mapili, ug wala siya pakyasa ni Papa Jesus niya.
BNH: Kabahin sa unsa pa nga mga istorya ang buot nimong himuon ug paambitan sa publiko? Ngano man?
Alan: Lawom nga pagkaykay sa epekto sa mga tinuod nga beneficiary sa pork barrel kinsa wala nay kaduolan. Unsay mahitabo kanila kong dili na makalihok ang PDAF, basin nakatutok lang ang tanan sa negatibong imahen sa PDAF ug ang pagwagtang niini apan walay solution alang niadtong mga nanginahanglan.
BNH: Unsay sunod nga mahitabo sa imong broadcasting career karon nga nagsunod-sunod na ang imong mga pasidungog? Aduna ka bay umaabot nga show nga ikaw na lang gyung usa ang muduma?
Alan: Magpadayon ko sa pagkat-on ug mopalambo pa sa akong trabaho, ang pasidungog secondary lang, ang mahinungdanon nga nahatagan nako og katagbawan ang mga tawong mituo ug misalig sa talento'ng gihatag kanako sa Ginoo. Upcoming show? Maayo unta naa..hehehe.. pero ang GMA na lang ang mag-igo. Basta thankful ko sa akong Kapuso Network nga gihatagan ko og break nga mahimong reporter ug news anchor.
BNH: Unsay dili nimo malimtan nga coverage (gawas niining para sa imong nadag-an) karong tuiga ug ngano man?
Alan: Chop- chop ladies. Gawas sa brutal nga krimen, natandog ko sa kasakit nga gibati sa mga ginikanan.
BNH: Giunsa nimo pagbalanse ang imong trabaho ug ang imong responsibilidad isip amahan ug bana?
Alan: Kutob sa bakante nakong oras ako jud ibubo sa akong pamilya, lutoan nako og mga sud-an, (bribe siguro aron dili maawayan ni misis.. hehe), pero nakasabot sila sa akong trabaho, mo-leave ko kong dunay mga kalihokan sa eskwelahan sa akong anak. Pamilya ang una jud. No day should ever be too hectic for family!
BNH: Unsay imong matang sa relaxation human sa labihan ka stressful nga responsibilidad sa trabaho?
Alan: Mag-videoke uban sa kong wife ug anak sa balay ra, magluto-luto og mga tsamba nga recipe...ako ang self-proclaimed MC (Murag Chef).
BNH: Unsay mensahi nimo sa mga nagbasa niining maong artikulo karon nga buot musunod sa imong mga tunob ug makab-ot ang susamang kalampusan nga imong natagamtam karon?
Alan: Maningkamot, padayong magkat-on, dili modako ang ulo, pabiling nakatunob sa yuta ang mga tiil ug molingi sa gigikanan, labaw sa tanan isilsil sa alimpatakan nga ang tanan naa nato gipahuwam lang sa Ginoo. Muingon man ang uban nga MP ko (Murag Pari o Murag Pastor) pero mao man ni ang akong gituohan...To God Be the Glory!
FAST FACTS
Name: Alan Pacional Domingo
Birthday:July 20, 1975
Birth Place:San Marcos, Sto. Nino Malaybalay City, Bukidnon
School:University of San Jose-Recoletos
Degree: AB Mass Communications
Principle in Life: "Tam-is ang kalamposan kong sa singot pinatol-an busa kinahanglan maningkamot pagkab-ot sa tingusbawan nga walay tawo'ng mayatakan."
Awards: Globe Media Excellence Awards back- to -back winner: 2012 Reporter of the Year for Television and Feature Story of the Year (Entry: Education-- estorya sa blind teacher nga nagtudlo sa mga blind students) ug 2013 Reporter of the Year and Feature Story for TV (Entry: Asinsuka o asin ug suka nga nagsimbolo sa grabeng kakabus).
Paspasay
1. Text or call? Call
2. Facebook or Twitter? Facebook
3. Short or pants? Short
4. Fine dining or pungko-pungko? Pungko-pungko
5. Basketball or boxing? Boxing
6. Coffee or Tea? Tea
7. Polo shirt or long sleeves? Polo shirt
8. Hollywood or Pinoy movies? Hollywood
9. Mike Enriquez or Arnold Clavio? Tulo sila apil si Kapusong Bobby Nalzaro
10. Jessica Soho or Mel Tiangco? Both