Sarah babasahan na ng sakdal

PIK: Si Mark Herras ang bida sa pilot episode ng bagong human drama program ng GMA 7 na magsisimula na sa Sabado.

Ito ‘yung Bingit na kung saan una nilang ilalahad ang kuwento ni June Abrozado, ang aide at kasama ng nasirang Department of Interior and Local Government Secretary Jesse Robredo sa plane crash na nangyari nung nakaraang taon.

PAK: Naghiwalay na pala sina Gian Magdangal at Sheree na live-in lovers ng mahigit anim na taon.

Ayaw na munang magsalita ni Sheree sa ngayon dahil isang linggo pa lang pala sila hiwalay at pinag-iisipan pa kung magsasalita pa ba siya dahil ayaw naman niyang magsalita pa nang ikasisira ni Gian.

Pero matagal na raw silang may problema at may naririnig pa siyang nali-link ngayon kay Gian kaya napagdesisyunan nilang tapusin na lang ang kanilang relasyon.

BOOM: Nakatakda ngayong araw ang arraignment ng kasong libel na isinampa ni Atty. Annette Gozon-Abrogar laban kay Sarah Lahbati.

Pero as of presstime, hindi pa matiyak kung matutuloy dahil sa isinumite ng kampo ni Sarah na motion to quash at dinidinig pa ito sa korte.

Kung matutuloy ito, sasamahan kaya ni Richard Gutierrez si Sarah bilang suporta sa hinaharap nitong kaso?

Nabanggit naman ni Richard na kay Sarah ang suporta niya kaya tahimik muna ang aktor ngayon kaugnay sa hinaharap nilang isyu.