Mabanhaw ra

CEBU, Philippines - Gipasalig ni Jonalyn Viray nga mabalik ra puhon ang grupo niya nga La Diva uban nila ni Aicelle Santos ug Maricris Garcia. Dili pa hinuon kini mahitabo karong tuiga gumikan kay todo pa ang pag-promote niya sa iyang solo concert.

Pagdayeg ra kutob

Igo ra sa pagdayeg si Ejay Falcon sa mga babaye nga iyang mapares sa mga serye apan wala gyud siya modiskarte niini aron dili siya masaypan nga migimik lang. Matud pa ni Ejay nga kahibalo siya molugar sa iyang kaugalingon busa mo-focus ra gyud siya sa iyang trabaho.

Molugwa sa telebisyon

Special guest ugma sa programang Kapamilya Deal or No Deal ang YouTube Sensation Genelyn Sandaga . Nikisaw ang pangalan ni Genelyn sa Youtube gumikan sa makaukay  niya nga version sa  “Just Give Me a Reason” ug  “I Knew You Were Trouble”. Nasayran nga napuno sa pagsaway si Genelyn gumikan kay wala nagkadimao ang lyrics sa iyang pagkanta.

Nagpungasi nga gugma

Nibalik og tikang si Isabel Oli sa taping sa Banana Split aron sa pagbisita sa iyang uyab nga si John Prats. Malipayon si Isabel gumikan kay nalayo na sa mga intriga ang iyang lovelife.

Juday-Sam movie?

Adunay mga sugyot ang fans ni Judy Ann Santos nga himoan unta og movie version ang serye nila ni Sam Milby nga Huwag Ka Lang Mawawala.  Wala na mohatag og komento ang kampo ni Juday niini ilabi na nga dunay mga hungihong nga mobalhin sa GMA-7 ang aktres.