Eugene Tan madaugon sa ikatulong pagsalmut!
CEBU, Philippines - Maayo nga dagan sa panahon ug kasadya ang miduyog sa 7th Huniño “Huni Halad Alang Kang Señor Santo Niño†original songwriting contest nga gipahigayon niadtong Martes sa gabii sa dakong hawanan sa Pilgrim Center sa Basilica del Sto. Niño.
Ang Ginama nila ni Eugene Tan ug Atty. Vicente Roco nga nag-ulohan og “I’ll Always Turn To You†maoy grand prize winner.
Gisaysay ni Tan dinhi sa Banat News Hugyaw (BNH) nga usa ka semana kapin ang paggama sa maong kanta ug dali niya kini nga nahulma gumikan sa kinasing-kasing niya nga debosyon ngadto kang Señor Santo Niño.
“Basta naa lang ka’y ideya sa tema sa kanta nga imong buhaton, dili gyud ka maglisod sa paghimo niini,†matud pa ni Tan.
Dugang pa niya nga ang unod sa awit niya nga “I’ll Always Turn To Youâ€, naghisgot sa common nga sitwasyon sa katawhan kinsa nag-atubang og daghang problema.
Bisan pa man sa kadaghang suliran, masulbad ra kini basta magpabilin lang ang pagsalig ngadto sa Balaang Bata.
“Naa man gyud nang problema, kinahanglan nga dili ta mo-surrender kay naa man ta’y kadangpan, ang Señor Santo Niño,†dugang pa ni Tan.
Una kini nga higayon nga usa ka English composition ang nakadaug sa Huniño busa dako kining hagit kang Tan sa dihang gigama ang maong kanta.
“Nakita nako nga bisan unsa nga language ang gamiton, wala kana’y problema kay ang mensahe man sa kanta ang labing importante,†suma pa niya.
DIli na basta-basta si Tan gumikan kay naa na siya’y rekord nga nahimong champion sa laing song writing contest, ang Cebu Pop Music Festival 2012.
Suma pa ni Tan nga nagpadayon ang debosyon niya ngadto sa balaang bata hinungdan nga nisalmot siya sa 7th Huniño.
Ikatulo na niyang pagka lakip sa finalist sa Hunino, apan ang nahaunang duha, wala siya makaangkon og luna. Para kang Tan, gasa sa Kahitas-an ang mao niya nga komposisyon.
Ang interpreter sa “I’ll Always Turn To You†nga Huni Sugbo nga gilangkoban nila ni Wilson Po, Daryl Shane Leong ug BenjieLayos maoy napili nga Best Interpreter busa giisip nga big winner ang maong awit karong tuiga. Ang tulo naila isip “Huni Sugbo.â€
Si Daryl nibutyag dinhi sa BNH nga dako ang ilang pasalamat kang Tan nga sila gihapon ang gipili nga mokanta sa gi-compose niini alang sa Huniño. Kahinumduman nga ang Huni Sugbo usab ang ni-interpret sa entry ni Tan sa Cebu Pop niadtong 2012.
Matud pa ni Daryl nga lapad ang pagtuon nila sa maong kanta gumikan kay kinahanglan gyud nga makuha nila ang emosyon sa maminaw niini gumikan kay naghisgot kini sa lig-ong debosyon ngadto kang Sto. Niño.
Gihulagway nga gawas sa hugyaw nila nga tingog, aduna pud sila’y maayong choreography sa entablado hinungdan nga sipa nga pakpak ang ilang nadawat gikan sa audience.
Matud pa sa mga sakop sa Huni Sugbo nga ang ilang kadaugan, ilahang gihalad ngadto sa Balaang Bata.
Samtang ang second prize winner mao ang awit nga “Santo Niño, Gasa Alang Kanamo†nga ginama nila ni Niño James Bañares ug Virgilio Amistad.
Ang nag-interpret niini nga si 2013 Sinulog Idol Second Runner-up Dan Valentin Escasinas III nisaysay nga dakong garbo alang kaniya nga siya maoy napili nga mohatag og kinabuhi sa maong awit gumikan kay naghisgot man kini kung unsa ka importante ang Balaang Bata sa kinabuhi sa mga tawo.
Una kini nga higayon nga ni-interpret si Dan og entry sa usa ka song writing contest busa nakulbaan siya og maayo sa wala pa magsugod ang kompetisyon.
Third prize winner usab ang awit nga “Ania AKo†nga mugna nila ni Jay Toreno ug Jundel Bacalso. Gihatagan usab kini og kinabuhi nila ni Joefel Pantiaga, Jundel Bacalso ug Alvin Gantuangco.
Nakadawat og P50,000 cash ang grand prize winner, P30,000 ang second, ug P20,000 ang 3rd, samtang nakadawat usab og cash ang best interpreter ug ang mga entry nga wala maka-puwesto.
Suma pa sa usa sa mga organizers sa maong kalihukan nga si Fr. Jonas Mejares, OSA, nga ang tumong sa Huniño mao ang pagdayeg ug pagpakita sa dakong pagtuo sa Kahitas-an pinaagi sa kanta ug pinasubay usab kini sa tema karong tuiga nga “Journeying in Faith with Sto. Niñoâ€.
Sama sa nangagi nga mga Huniño, nagpabilin nga makalingaw ang mga hosts nga sila si Mary Rose Maghuyop Villacastin ug Fr. Dan delos Angeles.
Nahugyaw usab ang audience pagbirit sa Pilipinas Got Talent Season 4 champion nga si Roel Manlangit kinsa special guest sa maong kompetisyon niadtong gabhiona.
Nidalit usab og makalingaw nga song number ang kanhi Pinoy Dream Academy scholar Apple Abarquez ug si Fr. Mejares kinsa nag-duet sa awit nga Please Be Careful With My Heart. (BANAT NEWS)
- Latest
