Behn Cervantes mipanaw: Hulagway iya sa Bagong Alyansang Makabayan

CEBU, Philippines - Mipanaw kagahapon ang inila nga theater ug film director ug aktibista nga si Benjamin “Behn” Cervantes gumikan sa kumplikasyon sa pneumonia, duha ka semana kini human siya nalandig sa Asian Hospital aron magpatambal ug 11 ka adlaw sa dili pa ang iyang 75th birthday.

Apan ang iyang kamatayon mimugna og kalibog kagahapon tali sa iyang mga higala gumikan sa hangyo sa nahisgutan nga ipahibawo kini, unya na og makalabay ang usa ka semana.

Ang www.rappler.com maoy mibuak sa istorya kabahin sa kamatayon ni Cervantes kagahapon sa udto. Apan gihimakak kini sa aktres, magsusulat ug director nga si Bibeth Orteza.

“Just spoke to Rovi, his niece. Behn is still with us. Critical but stable,” si Orteza, kinsa orihinal nga sakop ni Cervantes sa campus theater group UP Repertory Company, nagkanayon ngadto sa  InterAksyon pinaagi sa  text message kagahapon mga ala 1:12PM. Apan laing kauban ni Orteza kinsa theater professor ug director usab nga si Anton Juan, mi-insister pinaagi sa Facebook nga tinuod ang taho nga mipanaw na si Cervantes, base usab sa susamang tinubdan nga si Rovi. Hinungdan nga ang InterAksyon ug Rappler giangan-angan una ang pagmantala sa ilang istorya kabahin niini.

Suma pa sa Interaksyon, ang Facebook page sa UP Repertory Company mihimakak usab kabahin sa kamatayon ni Cervantes.

Apan ang InterAksyon nakadawat og laing mensahe gikan kang Orteza kagahapon sa ala 1:23PM nga nagkanayon, “Got this text from his sister, just now: ‘Bibeth, Rovi tried to follow Behn’s request of announcing his death after a week, but I have decided to confirm but request for 3 days family mourning. He will be cremated this afternoon to comply with his other wish. Thanks, Leleng.”

Gitino ni Orteza nga igsuon ni Cervantes si Leleng.

Paglabay sa usa ka oras mismong si Rovi na ang mi-post sa Facebook ug nagkanayon: “Tito Behn asked me to tell his friends about his death one week later and I was just following his wishes but since somebody spilled the beans, I will ask you all to please allow us three days to mourn as a family. I hope you will all understand my actions. God bless u all. Rovi”

Nasayran nga si Cervantes inila nga aktibista panahon sa Martial Law kauban sa National Artist for Film nga si anhing Lino Brocka, ug ilado usab sa Philippine theater isip director ug actor.

Ang political film nga “Sakada” maoy labing sikat nga pelikula nga ginama ni Cervantes.