Aron dili dako tan-awon

Happy Sunday! Kumusta na man mong tanan dira? Agosto na pod, naa na ta sa ikawalong buwan sa tuig. Ingon ana ka paspas ang panahon mao nga i-enjoy inyong adlaw adlaw nga pangbuhaton. Mao na ipadayon lang gihapon ang pagbasa diri kada Domingo ug ipadala inyong mga pangutana. Kay kana tanan ato na tubagon ug tagaan og solusyon. Anah lang!

1. Hello Ate Anna! I’m Melissa of Banawa, Cebu. Ask lang unta ko kung unsa akong isul-ob nga dili modako akong tiyan kay tiyanon man gud ko. Dili man sad ko ingon tambok nga babae, sakto2x lang. Unya dako man ako tiyan tan-awon. Salamat ate!

Hi Melissa! Likayi ang mga grabe ka luag nga mga tshirt o blouse kay mosamot ka klaro ang imong tiyan. Sul-ob og mga empire cut nga mga blouse, kana fit sa dughan dapit pero luag sa may tiyan dapit. Para maghatag og ilusyon ug mas mo focus sa imong bust area. Ayaw usab sul-ob og mga low rise nga pantalon, pilia kanang mopatong gyud sa imong tiyan para mogamay kini. Likayi ang mga sihag ug gaan nga panapton. Makatabang usab ang mga dark colored nga mga blouse.

2. Hello Ate! I’m Meme of Bogo. Ask lang unta ko kung unsay angay sa akong buhok nga mogamay ang akong agtang kay medyo dakuon jud kog agtang. Salamat ate!

Hi Meme! Daghan hairstyle mobagay sa mga dagko og agtang o mga dangason. Pwede ka magmubo og buhok pero imo kining ipa wavy o ipakulot dayon. Pwede sad kang magpataas pero naay bangs nga sideswept o pakilid. Pwede sad kang mag- fringe bangs para matabunan gyud imong agtang. Kung di ka ganahan og bangs, pagpa layer sa imong buhok unya ipahati sa tunga.

3. Hi Miss Anna! Mangutan ko asa ta pwede kapalit diri sa Cebu ug Abercrombie & Fitch, Hollister, American Eagle, Aeropostale nga tshirt and polo shirt?Salamat daan! From Kulay Maceda Magarin of Basak, Cebu.

Hi Kulay! Kana nga mga brands wala gyud na diri sa Cebu. Sa mga online shops ra na nimo sila makit-an. Tan-awa sa facebook ug instagram kay daghan kaayo namaligya ana nga mga brands. Pero ang American Eagle naa na sa Bonifacio High Street sa Manila.

4. Hi Im Mylene of Mandaue. Ask lang unta ko kung unsay angay isul-ob aron taas ang height tan-awon. Medyo tambok man gud ko. Thanks so much ate Anna

Hi Mylene! Daghan technique para motaas ka tan-awon pinaagi sa panamit o pananina. Ang mga maxi dress o mga sanina nga abot gyud sa sawog, makataas tan-awon. Make sure lang nga nindot kini og fitting para di ka modako. Ang pagsul-ob og heels, makatabang sad gyud, ilabina kung paresan nimo og mubo nga sayal o mubo nga shorts. Pwede sad ang mga highwaister shorts or trousers kay kini maghatag og ilusyon nga taas imong legs.

Pangutana para kang Anna? Kinahanglan kabahin lamang sa fashion ug pamatasan ang inyong ipadala karong Domingoha ngadto sa 0939-131-6599. Kinahanglan aduna kanay ngalan ug address. Kutob lamang karong 12 noon, August 11, ang pagdawat sa inyong mga pangutana. Go go go!