CEBU, Philippines - Gibana-bana nga mikabat ngadto sa 11, 000 ka mga tawo ang mihugop sa “My Husband’s Lover†mall show diha sa Gaisano Mactan Grand Mall ug laing 5,000 usab ang nagpunsisok diha sa SM City Cebu adtong Huwebes Gumikan niini, labihan ka dako sa ngisi ni GMA7 Cebu station manager Ann Marie Tan, kinsa miangkon nga nasorpresa siya sa kadaghan sa mga tawo sanglit labing una kadtong higayon nga nagpahigayon sila og mall sa adlaw nga Huwebes. Masabtan nga dili ingon niana kadaghan ang gipaabot nga mga tawo nga musuroy sa mall sa maong adlaw, sukwahi sa mga adlaw’ng Biyernes, Sabado, ug Domingo. “Hay salamat grabe kadaghan sa mga tawo, knowing nga Huwebes ha. Sa Mactan daghan kaayo’ng estudyante nga nag-uniform maong akong gipapangutana basin nag-cutting class kita’y mabasol. Pero half day ra man kuno ilang klase,†nagkanayon si Tan sa Banat News Hugyaw (BNH) human sa presscon sa lamian kaayo nga Ralfe’s Gourmet nga nahimutang sa Casal’s Village.
Nasayran nga wala gyud maukang ang mga tawo bisan pa man og nadelatar ang pag-abot sa mga artista nga gilangkuban sa mga bida nga sila si Dennis Trillo, Carla Abellana, Tom Rodriguez, Kevin Santos, Bettina Carlos, Victor Basa ug Kuh Ledesma. May mga nagbagutbot na diha sa SM sanglit, milapas na ang alas singko sa hapon wala pa makatungtong sa entablado ang ilang mga idolo sa sikat kaayo ug kontrobersyal nga primetime series sa GMA-7. Ang rason mao nga may kakulian sa flight sa mga artista, sanglit inay alas nuwebe sa buntag, nasibog kini ngadto na sa ala una sa hapon, hinungdan nga naapektuhan ang schedule, lakip na ang presscon nga gitakda unta atol sa paniudto apan nasibog na ngadto sa panihapon. Gikinahanglan pud nila nga mulupad pagbalik sa Manila, pagka alas nuwebe sa gabii sanglit may trabaho pa sila nga gibiyaan.
Labihan ka busy sa nahisgutang mga artista, ug ang Agosto 1 mao lamang ang bugtong petsa nga makalighot sila sa ilang mga responsibilidad sa trabaho ug makompleto sila dinhi sa Sugbo. Nasayran nga sa musunod nga mga mall shows, dili na makumpleto ang cast sanglit nagtipun-og ang gimbuhaton sa kasagaran nila nga produkto usab sa kasikat sa ilang serye.
Extended
Mitikang usab dinhi sa Sugbo ang head writer sa “My Husband’s Lover†nga si Suzette Doctolero ug siya mismo nakugang sa kadaghan sa mga tawo nga mihugop sa mall show. Una pa kadtong higayon nga mikuyog siya og mall show sa teleserye nga iyang sinuwat.
Dungan niini, gitug-an niya nga extended na diay gyud daan balig tulo ka semana ang nahisgutang teleserye sanglit ang orihinal niyang gisuwat mulungtad lamang unta og 16 weeks, pero 19 weeks na ang iyang nahuman og suwat.
Giklaro ni Doctolero nga bukas siya nga inaton pa ang istorya sa serye, apan iyang gipahimug-atan nga kun dili kini makaayo sa kinatibuk-ang dagan sa teleserye, dili kini niya ipugos ug iya na nga tapuson human sa 19 weeks. Gipasalamatan usab ni Doctolero si direk Dominic Zapata gumikan kay niya pa “perfect ang casting, ang galing galing nilang lahat.†Mipakpak pud siya sa kanindot matud pa sa mga eksena ug nahatagan gayud matud pa ni Zapata og tukmang atake ang iyang sinuwat.
Apan sukwahi kang Zapata nga sa usa ka interview namahayag nga naglibog pa siya unsaon paghuman ang My Husband’s Lover, giklaro ni Doctolero nga aduna na sila matud pay tulo ka gipilian nga maoy mamahimong ending, depende sa dagan sa istorya. “My three options kami for an ending. Di pa lamang naming alam alin dun. Pero it’s a happy ending,†tug-an pa niya.
Gipaambit pud ni Doctolero nga dako matud pa og kausaban ang mahitabo sa pagkatawo ni Vincent (Tom Rodriguez) karon nga miabot na ang iyang ig-agaw nga si Zandro (Kempee de Leon). ‘Turning point matud pa kini sa character ni Lally (Carla Abellana).
Samtang gitug-an ni Doctolero nga sukwahi sa mga nanggawas nga istorya, dili matud pa makasala sa iyang kaminyuon si Lally bisan pa man og nagka higala na kini og si Paul (Pacho Magno). “Don’t worry Lally will remain pure. Paul will just be a very good friend,†pagsiguro niya.
Nabun-og si Lally
Human sa duha ka mall shows, nabantayan sa mga sakop sa E-Group (Cebu Entertainment Group) nga may mga garas ug bun-og ang mga bukton ni Carla. Suma pa ni Lally nga sa ilang show sa Mactan, may problema matud pa ang elevator sa mall, hinungdan nga naghagdanan sila. Gumikan niini gikuninitan matud pa sila sa bagang duot sa mga tawo nga miresulta sa iyang mga garas sa bukton.
Ang duha ka lagom sa iyang isig ka bukton, resulta sa hugot matud pa kaayo nga paggunit ni Tom niya atol sa usa sa ilang mga eksena. Si Tom nga tupad ni Carla atol sa interview nagpunay og pangayo og pasaylo nga gitubag sa dalaga og pahiyom. Nakasabot siya nga trabaho lamang ang tanan.
Bisan pa man sa iyang mga garas, malipayon kaayo si Carla sanglit daghan matud pa sa mga mihugop ang Team Lally ug tataw matud pa nga nagsunod gyud sila sa matag episode sanglit dayag kaayo sa mainiton nilang paghangop sa tibuok cast adtong Huwebes.