Ang Born Impact makita human sa AHA!

Gamhanan nga Kangkong

Nagkadaghan karon ang mga klase sa pagkaon, apan angay masayod ang kadaghanan nga dunay utanon nga dali ra nga pangitaon  ug usa na niini ang water spinach  nga nailhan dinhi sa Pilipinas isip “Kangkong”.

Gani dali ra kini makit-an kilid sa mga sapa ug kasagaran tag singko ang bugkos  niini sa  mga tindahan.   

Adunay mga pagtuon nga ang kangkong adunay hypoglycemic o anti-diabetic properties  kung diin ang pagkaon niini makatabang sa pagbalanse sa blood sugar.

Makaangkon ka usab  sa normal nga pag-ihi  ug mahalikay usab sa liver cirrhosis, hypertension ug  kidney diseases.

Maayo usab nga tinubdan ang kangkong sa antioxidants busa kaayohan sa panglawas ang maangkon sa usa ka tawo nga mokaon sa maong utanon.

Naa usab sa kangkong ang iron, calcium, vitamins B, vitamin  C ug amino acids.

Mohatag usab kini og positibo nga reaksyon ilabi na sa tawo nga naghambin og  hypertension. 

Motabang kini sa pagbanlas  sa  “fatty deposits”  nga naa sa  alimentary canal nga maoy nakababag sa agianan sa dugo.

Mopaminos usab ang kangkong sa menstrual pain ug sa pagpanakit sa ngipon.

Dinhi sa nasud, kasagaran sa kangkong pabukalan ug sagolan og karne o isda aron mahimo kini nga lamian sa pag-serve niini sa lamesa.

Pabukalan lang og pipila ka minutos ang kangkong , butangan dayon gamay nga olive oil ug seasoning ug puwede na kaayo kini nga isud-an.

Barato ra ang kangkong, apan  dako nga kaayohan ang mahatag niini ngadto sa mga tawo. (Gikan sa aizapenaranda. wordpress.com  ug  http://gusto kohealthyka.blogspot.com)