Ryan co-prod na sa TV5

Ilang araw nang hindi napapanood sa Eat...Bulaga si Ryan Agoncillo, nasa Los Angeles ito kasama ang asawang si Judy Ann Santos dahil doon sila nag-celebrate ng kanilang fourth wedding anniversary at birthday na rin ng aktres. Pagbalik ni Ryan, aasikasuhin na ang sitcom sa TV5 na hindi lang siya artista, co-producer din katulong ang Archangel Media ni Mr. Tony Tuviera.

Wala pang final title ang sitcom, kung saan, si Joey Reyes ang director at writer. Wala pa ring na­ba­banggit kung sino ang mga makakasama ni Ryan sa talents ng TV5. Kundi kami nagkakamali, first time ni Ryan na pumasok sa co-production venture, kaya sobrang excited. Matutupad na rin ang matagal na nitong gusto na gumawa ng sitcom para maiba ang mapapanood sa kanya ng viewers.

Samantala, ang alam namin, may gagawing pelikula si Ryan at isa siyang superhero. Ano na kaya ang nangyari sa planong ito?

Elmo at Lauren huling nagwo-workout

Na-report ng pep.ph na spotted sina Elmo Magalona at Lauren Young na nagwu-workout sa gym ng GA Towers sa may Mandaluyong. Inisip namin na rito may condo unit ang aktres dahil hindi naman yata allowed gumamit ng gym kung hindi tenant ng condo.

Naku, hindi magugustuhan ni Lauren kung pag-iisipan sila ng iba ni Elmo dahil lang nakitang sabay nagdyi-gym. Nasulat na naming hindi nito ikinatutuwa na patuloy silang nali-link ni Elmo nang makausap namin sa taping ng Mundo Mo’y Akin. Hindi ba raw puwedeng friends lang sila ni Elmo at mas naging close pa dahil manager niya ang ina nitong si Pia Magalona.

Maraming production number ni Julie Ann sa Party P. inirereklamo na

Mamaya na sa Music Museum ang major concert ni Julie Anne San Jose na It’s My Time. Ang balita namin dahil mabenta ang tiket, gusto ng producer na magkaroon ng repeat ang concert.

Sayang pala at hindi ipina-interview ng GMA Artist si Julie Anne para personal na masagot ang isyung nagtatampo ang ilang talents ng GMA kay Julie Anne at kina direk Rico at Mark Reyes dahil every Sunday na lang, si Julie Anne ang may pinakamaraming production numbers sa show.