Excellent King

Hulagway kuha ni Ferdinand Edralin

CEBU, Philippines - Bisan sa kadaghang buluhatunon, wala kini mahimong babag para sa 20- anyos nga si King Anthony Yap Perez aron mutapos sa kolehiyo ug mapili pa gyud nga recipient sa GMA Network Excellence Award sa Visayas.

Nigradwar si King sa kursong Mass Communication sa University of the Philiipines- Cebu sa miaging semana.

Siya ang labing una nga lalaki nga nakaangkon sa maong pasidungog sukad sa pagsugod niini sa milabay nga tulo ka tuig dinhi sa Sugbo.

“Wala gyud ko ga-expect nga mapili ko sa GMA-7, kay duha man mi ang gipilian, dako na kayo ni nga achievement para nako,” matud pa ni King kinsa Cum Laude usab sa iyang pag-gradwar.

Gipili ni King ang kursong Mass Communication gumikan kay nakita niya nga importante kaayo ang paghatag og impormasyon sa publiko aron kini masayod kung unsa man gyud ang istado sa komunidad.

“Political Science man unta akong kuhaon, pero pag-abot nako sa high school, kalit man lang na usab akong huna-huna,” saysay pa ni King kinsa nangandoy usab nga mamahimong abogado.

Nahuman siya sa elementary sa Cebu Eastern College diin mitapos siya isip First Honorable Mention.

Pag-abot sa sekondarya, napili usab siya nga First Honorable Mention sa susama gihapon nga tunghaan.

Usa sa giidolo niya nga news personality mao ang GMA-7 reporter nga si Kara David gumikan kay maayo kini mo-presenta sa nagkadaiyang dagway sa katilingban.

Samtang sa local news personality, iyahang idolo mao ang Balitang Bisdak reporter nga si Allan Dominggo gumikan kay maayo usab kini mo-presenta as iyang balita.

Dili basta-basta si King kay sa panahon sa iyang pagtungha, aktibo usab siya sa nagkadaiyang kalihukan sa pagyagyag sa nagkadaiyang problema sa mga tawo ngadto sa gobyerno.

Aminado si King mo-martsa siya sa kadalanan aron ipadungog sa gobyerno ang yangongu sa mga tawo sa nagkuwang nga serbisyo.

Naglingkod siya isip usa sa mga opisyales sa Kabataan Party-list nga usa sa naghatag og tingog sa mga kabatan-onan didto sa kongreso.

“Dili man dautan ang akong pagka-aktibista kay igo raman mitingog kung unsa ang mga pagkuwang sa gobyerno,” suma pa ni King.

Usa sa gipanawagan niya sa gobyerno nga hatagan og makatarunganon nga budget ang mga state universities sa nasud aron daghan mga kabatan-onan ang maka-eskwela.

“Di ba usa sa problema karon sa nasud mao nga daghan kaayo ang walay trabaho, kung daghan pa ang nakahuman og eskwela, dili gyud unta maglisod ang mga tawo. Dapat hatagan unta og sakto nga  budget sa edukasyon,” nagkanayon si King.

Naning siya tan-awon, apan wala nagpasabot nga sa pagtoon na lang nakaponting ang iyang oras, mogahin usab siya og oras sa iyang mga higala.

“Time management ra man gyud na, nay gyu’y time nga kinahanglan ta malingaw ta,” hirit pa ni King.

Adunay mga panahon nga kung dunay angay nga tun-anan, o mga assignments,   matulog siya og tulo ngadto lang sa upat ka oras ug mao kini ang gitawag niya og sakripisyo sa usa ka tinun-an aron makab-ot ang mga pangandoy niini.

“Importante kaayo ang sakripisyo,  kung ganahan gyud ka mahuman sa pag-eskwela, mabuhat man gyud na nimo. Kung nagpaluya-luya pa ko , dili gyud ko molampos,” dugang pa ni King.                

Tambag pa niya sa mga kabatan-onan nga nagtungha pa, kinahanglan nga  hatagan og importansya ang edukasyon.

   “Sa dili paka mosulod sa usa ka butang, imoha gyud pangutan-on imong kaugalingon kung mahaom ba na nimo. Isulod pud sa huna-huna ang purpose sa imong  kinabuhi ug ipadayon ang paningkamot,” matud pa ni King.

Tinuig na nga  gihimo ang  GMA Network Excellence Award alang sa mga outstanding graduates sa broadcast-related courses ug lakip na ang  Electronics Communications Engineering gikan sa  mga partner nila nga mga tunghaan kung diin ang tinun-an nagpakita sa maayo nila  nga pagka-leader  ug hugyaw usab ang academic performance.

“Passion for excellence is one of the core values of GMA Network. In order to nurture this, we undertake CSR projects such as the GMA Network Excellence Award to encourage media practitioners to be exceptional,” matud pa ni GMA Network Assistant Vice President for Corporate Affairs  nga si Ma. Teresa Pacis.

Pipila sa produkto  ninii ang nagtrabaho na sa  GMA, sama nila ni  GMA News reporters Dano Tingcungco, Jam Sesante, Micaela Papa, GMA News Online reporter Kimberly Jane Tan, Saksi segment producer Sophia Balod, ug GMA Cebu sales producer Rachel Sindo.

Samtang sa habig ni King, gipangandoy usab niya nga makatrabaho sa Kapuso Network  partikular na sa news and  public affairs programs.