CEBU, Philippines -Giatngan na pag-ayo ang padayong pagdepensa sa Cebu sa titulo nga Reyna ng Aliwan sulod na sa pipila ka mga tuig.
Ang maong indigay maoy usa sa mga gikahinaman nga bahin sa Aliwan Fiesta didto sa Pasay City.
Ang mga representante sa Cebu maoy narayna niini sa sagunson na nga upat ka tuig ug kini naglangkob nila ni Sian Elizabeth Maynard niadtong 2009, Rizzini Alexis Gomez (kasamtangang naghupot sa titulong Miss Tourism International) niadtong 2010, Rogelie Catacutan niadtong 2011 ug Angeli Dione Gomez sa miaging tuig. Lig-on gihapon ang pambato sa Cebu karong tuiga nga motigi sa ubang kandidata alang sa coronation night karong Sabado.
Kini mao ang 18 anyos nga si Jamie Herrell, ang Sinulog Festival Queen 2012 .
Si Sinulog Foundation Inc. (SFI) Executive Director Ricky Ballesteros nagkanayon nga nahaom gyud si Jamie sa maong kompetisyon gumikan sa maayong personalidad niini.
“The moment I saw her being interviewed on TV during one of the Sinulog Festival Queen rehearsals, I already considered her as a shoo-in representative. She was very telegenic, bubbly and spontaneous in that interview. She can carry on a conversation and I found her personality interesting and down-to-earth. Plus, she’s a very good dancer,†matud pa ni Ballesteros.
Kahinumduman nga nalangkat ni Jamie ang nagkadaiyang awards sa Sinulog Festival Queen 2013 nga naglangkob sa Best in Group Performance, Best in Opening Production Number ug Best Solo Performer.
Dili na bag-o kang Jamie ang pagsayaw sanglit ang pamilya niya maoy nagdumala sa dance company sa Lapu-Lapu City nga Mactan Dynamics.
Kahibalo siya mosayaw og ballet, jazz, cultural, Hawaiian ug Tahitian. Nakasayaw na usab siya uban sa Sandiego Dance Company niadtong Sinulog 2012.
Kasamtangang nagtungha si Jamie sa University of San Jose Recoletos ubos sa kursong Mass Communication.
Siya usab ang first runner-up sa Miss Lapu-Lapu niadtong 2012. (Sanden J. Anadia, gikan sa taho ni Vanessa Balbuena sa The Freeman)