Karen ug Yves best in binukingay!

CEBU, Philippines - Nahugyaw ang mga nangaon lakip na ang mga kawani sa Lighthouse restaurant sa Mango Avenue adtong Sabado sa udto gumikan sa ka “kikay” sa Pinoy Big Brother first runner-up nga si Karen Reyes, ilabi na dihang gipa re-enact niya ang lihuk sa iyang kauban pud niadtong tungora nga si Yves Flores nga matud pa niya nagpa-cute niya kaniadto sa wala pa siya misulod sa balay. Bida pa niya nga sa audition pa lang, gara na matud pa si Yves, kinsa nagsige og siko niya adtong higayona kay dili matud pa tinuod. Giangkon hinuon ni Yves ang gilenggua ni Karen nga sa pagsulod gyud nila sa balay, siya maoy unang gipangita sa nahisgutang teen star nga taga Tarlac.

“Nasaan na yung taga Mindoro?,” hinumdom pa ni Karen sa pagpangita ni Yves niya. Sa balay nagpa-cute matud pa niya si Yves, hasta pud si Kit Thompson. Pero ang nagmadaugon gyud niya pa mao ang iyang ka loveteam nga si Ryan Boyce, kinsa sa sinugdanan giingon lamang niya nga nanguyab pa niya, pero sa kadugayan giangkon niya nga ka MU na niya, gumikan usab sa pagbuking ni Yves. “Oo MU na kami. Ikaw ba naman ang bigyan ng napakalaking teddy bear nong Valentine’s Day,” bida pa niya. 

Sila si Karen ug Yves ang mga celebrity guests sa Gaisano Inc. alang sa final draw sa Million Thanks raffle promo, diin gikagubtan sila og maayo sa mga taga Balamban nianang pagkahapon nga labihang nakaabiba ug nagpunsisok sa Balamban Town Center ug nianang pagka gabii gihugupan pud sila og maayo sa Gaisano Country Mall. Tsika ni Yves nga kadaghan na matud pa siya naka-schedule nga mag-Cebu apan kanunay nga na-cancel---ang imbitasyon ra ni Mommy Rose Gaisano gyud maoy nakapataak niya sa Sugbo, hinungdan nga perte niyang lipaya.

Dihang gikomedyahan silang duha sa press nga basin og magka develop sila samtang naa sa Sugbo, ilabi na nga unang higayon kadto nga nagkuyog silang duruha outside Manila, mikisikisi si Karen kay “one of the boys,” ra gyud matud pa siya. Ka tropa matud pa niya si Yves. Labaw sa tanan, dili matud pa pwede kay may Myrtle Sarrosa na si Yves. Gisiko na pud ni Yves si Myrtle kay dili matud pa tinuod.

Pero bisan sa iyang ka malipayon, may nagpahipi nga magul-anong istorya human gipusil ang iyang amahan gumikan sa panaglalis sa trapiko. Kana ug ang memories matud pa sa PBB ang makapahilak gyud niya. Kun makadungog siya sa kanta ni Carley Rae Jepsen nga “Call Me Maybe” makahilak dayon siya sanglit mao matud pa kini ang magpahinumdom niya unsa sila kasuod sa PBB house kaniadto. “Kasi dun talaga, close kami. We’re like brothers and sisters,” lenggua pa niya.

Mapasigarbuhon siya nga 15-anyos pa lamang siya dihang namasin siya sa audition sa PBB sa SM Mall of Asia kauban ang ilang silingan nga maoy nag-atiman niya ug sa iyang mga igsuon kaniadto samtang busy ang ilang inahan pag-asikaso sa kaso sa ilang amahan. Labihan matud pa kadaghang tawo, apan misugal na lang gyud siya kay ganahan gyud siya mag-artista. Suma pa niya nga kun ugaling wala pa siya nakuha isip housemate, “charge to experience” na lang ang tanan. Importante misuway siya. Pero, nakaplano na ang iyang kapalaran kay niya pa,” proud po ako na sa 28, 000 na nag-audition, kasama ako sa 15.”

Ganahan matud pa siya nga suwayan tanan—comedy, drama, action. Dihang gi-ingnan nga murag dili siya epektibo sa drama sanglit labihan niya ka hingatawa, mi-insister gyud siya nga kaya niya. Pwes, mi-sample ang naila nga “Hagikhik Chick,” pinaagi sa pag-atubang kang Yves nga iyang tupad adtong tungora. “Sabi mo mahal mo ako, bakit mo ako iniwan?,” emote pa niya with matching bakho. Apan wala mi-react si Yves, busa iyang gibira ug gi-ingnan, “hoy ano ba, may sinabi ako sa’yo.” Dinhi mikatawa ang press. “Bakit po kayo tumatawa kuya,” pangutana pa niya. Dihang gitubag nga kataw-anan kayo siyang tan-awon samtang nag-emote, giingnan na pud niya si Yves og,” kasi sagutin mo ako!”

Sila si JM de Guzman, Coco Martin ug John Lloyd Cruz ang iyang mga crush sa showbiz gumikan kay maayo matud pa mu-arte. Pero, dili niya malimtan nga gihawkan matud pa siya ni Sam Milby dihang nakit-an niya sa ABS-CBN lobby. Sexy para niya sila si Sam ug Zanjoe Marudo. Sa mga aktres, idol niya sila si Angel Locsin, Bea Alonzo ug Angelica Panganiban.

Pasigarbo pa niya nga naka- graduate gyud matud pa siya og high school adtong Marso ug nakadawat siya og tulo ka ‘achiever’s award.” Ang nahitabo mao nga padad-an siya og modules nga maoy iyang gipangtubag ug mipauli lamang siya sa Mindoro niadtong panahon na para sa periodical examinations niya. Plano niya nga mukuha og tourism bahala na matud pa og gi-ingnan siya nga dili na indemand ang maong kurso. “Ano ngayon? Gusto ko talaga eh.” Gawas sa pag-artista, pangandoy pud niya nga mamahimong flight attendant kay “gusto ko po ang nakalipad-lipad.” (BANAT NEWS)