CEBU, Philippines - Human sa primer sa Bb. Pilipinas nga gisalida sa ABS-CBN adtong Domingo sa gabii, nausab na ang dagan sa sultada sa labing prestihiyoso nga indigay sa kaanyag sa nasud. May mga kandidata nga early favorites, apan daw napawong na ang ilang kainit, may uban nga inanay na nga mi-awop ang ilang bidlisiw, samtang may uban nga wala hatagi og pagtagad sa sinugdanan apan kalit lamang nga gikahinaman pagkakaron.
Kining tanan naggumikan kay nadungog na sa publiko ang ilang abilidad sa pagtabi, gipaambitan na nila unsay sulod sa ilang kasingkasing ug hunahuna. Mas naila na karon sa mga mahiligon sa beauty pageants kinsa sila, likod sa ilang kamaayo murampa ug sa mapahiyumon nilang mga dagway atubangan sa camera.
Alang sa mga beauty pageant observers, ug sa walay pagduhaduha, dili kabintahaan ang mga pambato sa Sugbo kun binabaay lamang ang hisgutan—dili kay makamao lamang sila manabi, kundili undanon ang ilang mga pulong ug kinasingkasing. Ang mga pambato sa Sugbo karong tuiga naglakip kanila ni Miss Aliwan 2012 Angeli Gomez ug mga runners-up sa Miss Cebu nga sila si Matet Gorgonio ug Kim Artugue.
Suma pa sa blogger nga si Norman (http://normannorman.com/), tataw nga ang tulo ka mga Cebuanas ang labing hawod sa binabaay gamit ang English.Pasok pud para ni Norman sila si Aiyana Mikiewicz ug Mariel de Leon. Pasok pud sila si Bea Santiago, Parul Shah, Cassy Naidas, Ivy Gonzales, Sandra Flores, Hannah Sison, Ria Rabajante ug Paula Bernasor.
Samtang may mga pageant observers nga nanag-an nga si Charmaine Elima gayud matud pa ang mugawas nga mananaog sanglit Pinay kaayo og dagway ug siguradong mauyonan ni Donald Trump sa Miss Universe. Sa pikas bahin may nanag-an nga labing lig-on niyang kumpetisyon mao ang model nga si Bea Santiago nga pambato sa Masbate.