Sugat sa Guadalupe 2013

CEBU, Philippines - Andam na ang Archdiocesan Shrine of Our Lady of Guadalupe Parish sa  pagsaulog sa Semana Santa pinaagi sa buhing paghulagway sa mga kasinatian ni Hesus partikular na sa pagtubos niya sa mga sala sa katawhan nga misampot sa iyang kamatayon sa krus.

Gipaabot nga makahuluganon ang paglab-as sa kamatayon ug kabanhawan ni Hesus karong tuiga, sanglit magsilbi usab kini isip pamaagi aron makahipos og igong pundo alang sa nagpadayon nga konstruksyon sa kombento sa maong proyekto.

Nagmalaumon ang mga organizers sa maong kalihukan  nga makalikom og hinabang pinansyal gikan sa mga nagkadaiyang sponsors.

Subling naghugpong ang Parish Youth Coordinating Council-Guadalupe ug mga kabatan-onan nga nagikan   pa sa Pardo ug Argao  aron sa  paghandum sa Semana Santa alang sa katumanan sa pangindahay sa parokya.

Sa pagka-karon, makita sa mga parokyano sa Guadalupe , nga matag dunay pundo, anam-anamon gyud ang kontruksyon sa kombento.

Karong adlawa , March 24 , Palm Sunday, ipahigayon ang  usa ka passion play sa maong parokya .

Ug ang labing giatngan sa kadaghanan, mao ang Grand Sugat sa Guadalupe 2013  karong March 31 nga maoy adlaw sa paghandom sa pagkabanhaw ni Hesus.

Sa unang bahin niini, himuon ang mga pasiunang mga pasundayag nga  paambitan sa mga local performers  ug ang uban niini  nagikan pa sa laing dapit .

Himoon usab ang pre-drama kung diin makahatag gyud og leksyon sa mga manan-away.

Pagasundan usab kini sa tradisyonal nga dula kabahin sa pagkabanhaw ni Hesus gikan sa mapait niya nga kamatayon sa krus ug ang ilang panagtagbo sa iyang inahan nga si Maria.

Wala  nay puas ang pagbansay-bansay sa mga kabatan-onan sa parokya alang sa hugyaw nga pasundayag sa nahisgutang mga adlaw nga timaan sa pagtamod sa Semana Santa.

Pipila sa main casts naglangkob nila ni Vivien Parami (Mother Mary), Rennedy Cabaluna (Jesus Christ),  Jeanette Lavilla (Magdalena), Shea Ira Panilagao ( Claudia) ug Makoy Bolongon (Pilato).

Ang inila na nga personalidad sa dySS Super Radyo nga si Aljin Abaquita maoy direktor sa maong kalihukan.

Gisaysay ni Abaquita nga angayan usab atngan ang gipangbitay nga anghel nga maoy motaud sa korona ni Mama Mary.

Sa ikaduhang higayon, mohatag usab sa iyang espesyal nga partisipasyon ang sikat nga local news personality nga si Lou-Ann Mae Rondina.