Geoff aminadong magaling sa kainan kaya lumobo ang katawan

Aminado si Geoff Eigenmann na malakas siyang kumain kaya tumaba. Kaya naman hindi na-o-offend sa comment na maganda ang Forever  at magaling siya, kaya lang malapad siya dahil totoo. Hindi pa siya nakakapag-workout nang husto dahil sa taping at biking lang ang nagagawa niya.

After Forever, hindi pa rin makakapag-workout si Geoff dahil aalis siya for the States sa first week ng April for his green card. Ten days siya roon, kaya hindi sila makapag-plano ni Carla Abellana ng bakasyon sa Holy Week.

Wala pa ring balak mag­pakasal sina Geoff at Carla kahit parehong nasa marrying age na sila dahil inuuna ng aktor ang makabili o makapagpatayo ng bahay. Natatagalan siyang maghanap dahil may specific look siyang gusto, specific numbers of bedrooms at dapat malaki ang yard para sa mga alaga nilang aso.

Samantala, kung sina Geoff at Heart Evangelista ang masusunod, gusto nilang magtapos ang Forever  na may reincarnation ang mga karakter nilang sina Patrick at Isadora na magpu-fulfill ng love story nila.

Dream ni Geoff na maging director someday at gusto niyang idirek ang lola niyang si Rosemarie Gil dahil marami itong pinagdaanan na puwedeng isama sa movie.

May gagawin palang pelikula sa abroad si Carla at nabanggit ito ni Geoff. Wala lang masyadong alam sa details ang aktor, ang alam lang, ang ma­na­ger ng GF na si Arnold Vegafria ang nilapitan at kinausap ng producer. Sa abroad ang shooting ng movie at dahil ayaw pangunahan ni Geoff si Carla at ang manager nito, hindi binanggit kung saan.

Tamang-tama dahil wala pang soap sa GMA-7 si Carla dahil ‘yung Mrs. Snow White nila ni Ray­mart Santiago ay nakansela. Naggi-guest muna ang aktres sa ibang shows ng network habang inaayos pa ang next soap niya.

Ricky napiling judge sa Asean International Filmfest

Isa pang paalis ay si director Ricky Davao, pa-Malaysia siya dahil isa sa jury ng Asean International Film Festival and Awards o AIFFA. Gaganapin ito sa Sarawak mula March 28-30. Honored si Direk Ricky dahil Asean ito at naniniwalang malaki ang maitutulong sa Philippine cinema ng AIFFA.

Si Direk Dante Garcia ang nag-submit ng name niya sa organizers, all-expenses paid ito at marami siyang matututunan doon dahil may mga taga-Hollywood producers na guest speakers.

Samantala, hindi pa alam ni Direk Ricky kung paano ang ending ng Forever, pero kung siya ang masusunod, gusto niyang magkatuluyan sina Adora at Ramon. Kung paano ito gagawin, bahala na ang writers dahil sa story, patay na si Ramon at matanda na si Adora.

Dennis ala-Marjorie pa rin ang ipinalit sa ex

Habang naghihintay ng takes sa Raketeros, ipina­kita ni Dennis Padilla sa press ang picture ng Austra­lian GF niya at ang kanilang anak. Iisa ang comment ng press, kamukha ng ex-partner ng comedian na si Marjorie Barretto ang present GF, mas maputi lang at mestiza.

Nakantyawan tuloy si Dennis na hindi pa naka-get over kay Marjorie dahil ang ipinalit ay kamukha nito. Sagot nito, nagkataon lang na magkamukha ang da­lawa, pero kahit siya, hindi kumbinsido.

Very proud si Dennis sa kanyang GF at bagong baby, pero mahal din niya ang mga anak sa dalawang unang nakarelasyon. Mag-aartista na nga raw si Julia, anak nila ni Marjorie at alam din niyang marami ang may crush sa magandang anak.

Ang Raketeros ang huling showbiz project ni Dennis pansamantala dahil kakandidato siya. Ma­buti na lang at tapos na ang election sa showing nito na sabi ni Quezon City Mayor Herbert Bautista, kundi sa 3rd week ay fourth week ng May.