Showtime wagtangon Kris, Vice, Ai Ai ihulip?

CEBU, Philippines - Sumsuman karon ang tsika nga sa dili madugay tangtangon na gayud matud pa ang It’s Showtime gumikan kay alkanse na matud pa ang network. Apan matud pa sa mga tinubdan, mismong ang production team sa nahisgutang show ang makugang unya niini, sanglit wala pa sila masayod niining gipaabot nila nga pagbabu.

Bisan pa man matud pa sa pagpanghimakak sa mga hosts niini ug sa uban pang naglangkub sa maong show nga dili sila mawagtang, may mga tinubdan nga miingon nga seryoso  gayud matud pa karon nga gitun-an sa mga kadagkuan sa network nga wagtangon na lamang gayud sa hingpit ang It’s Showtime.

Kini bisan pa man og may positibong kalambuan na nga nakita sa ilang rating niining bag-o lamang ug may mga bag-o pud nga segments ang gidugang sama sa nauyonan karon sa publiko nga Kaloka o Ka Lookalike.

Ang rason matud pa nga alksanse ang network sanglit dako kaayo og gasto ang production matag adlaw ug dili paigo ang kita niini gikan sa advertisements.

Suma pa gitun-an pud karon sa network ang posibilidad nga sila si Kris Aquino, Vice Ganda ug Ai Ai delas Alas maoy himuong main hosts sa ihulip unya nga show sanglit napamatud-an man ang ilang chemistry ug timing sa mega blockbuster movie nila sa milabay nga Metro Manila Film Festival Sisterakas.