Magical ‘tail’ ni Aryana, magtatapos na

MANILA, Philippines - Bukas na, Biyernes (Enero 25) na ang finale ng top-rating fantaserye ng ABS-CBN na Aryana na pinagbibidahan ng Kapamilya teen star na si Ella Cruz. Matapos ang mahigit walong buwan na pamamayagpag sa ere, tutukan ang mga makapigil-hiningang tagpo sa pamilya nina Aryana (Ella), Ofelia (Pokwang), at Victor (Tonton Gutierrez) ngayong tuluyan nang nawala ang mahiwagang perlas. Paano nga ba mapipigilan ni Victor ang masasamang balak nina Stella (G Toengi) at Jason (Richard Quan)? Sa gitna ng pagsalakay ng mga tao sa mga sirena, magiging mapayapa pa nga ba ang kaharian nina Neptuna (Desiree del Valle) at Reyna Hiyasmin (Tetchie Agbayani)?

Matapos ang iba’t ibang pagsubok na kanyang hinarap dahil sa kanyang sumpa, isasakripisyo nga ba ni Aryana ang pagkawala ng kanyang buntot para sa buhay ng kanyang ina na si Ofelia? Huwag palampasin ang pagtatapos ng magical ‘tail’ ni Aryana, ngayong Bi­yernes sa Primetime Bida ng ABS-CBN, bago mag TV Patrol.