‘Hindi buntis si Sarah!’ - Richard

O, ayan ha? Mismong si Richard Gutierrez ang nag-deny sa balita na buntis ang kanyang girlfriend na si Sarah Lahbati.

Itinanggi ni Richard ang tsismis sa grand press­con ng Seduction sa Imperial Palace Sui­tes noong Biyernes at kung may mga hindi ma­niniwa­la sa kanyang denial, sila na ang may problema, hindi sina Richard at Sarah.

Ganyan ang mga tsismosa at intrigera. Kung ano ang gusto nila na paniwalaan ‘yon ang ka­nilang nais na marinig, kahit kasinungalingan. Kadalasan, mas marunong pa sila sa mga tao na sangkot sa mga isyu.

Kapag idinenay na buntis, nagpalaglag ang sa­sabihin ng mga tao na walang contentment sa buhay at kaligayahan na ang manira ng kapwa.

First time na may nagtanong kay Richard tungkol sa tunay na kalagayan ni Sarah at dahil sumagot na siya, hopefully, manahimik na ang mga basher nila.

Inulit ni Richard sa presscon ng Seduction ang kanyang sinabi na miss na miss na miss niya si Sarah.

Sana raw na-experience ni Sarah ang i-promote ang kanilang pelikula na ipalalabas sa mga sinehan sa Jan. 30.

Ipinakita sa presscon ang mga behind the scene ng Seduction kaya naniwala ang entertainment press na hindi pralala o press release ang maiinit na love scene nina Richard at Sarah at nina Richard at Solenn Heussaff.

Ipapa-review pa lang ng Regal Entertainment, Inc. sa MTRCB (Movie and Television Review and Classification Board) ang pelikula. Hoping ang mga produ ng Seduction na hindi makakatay ang sizzling love scenes ng kanilang opening salvo sa 2013.

Acting ni Meg nagustuhan sa Premiere Night

Maligayang-maligaya si Meg Imperial dahil successful ang premiere night ng Menor de Edad noong Jan. 16.

Nagpapasalamat si Meg sa mga sumuporta sa kanyang launching movie at sa mga bumati dahil nagustuhan ang acting niya sa pelikula na showing naman sa mga sinehan sa Jan. 23.

Isa na lang ang ipinagdarasal ni Meg, ang pila­han sa takilya ang Menor de Edad para hindi masayang ang effort ng Viva Films at ng mga co-worker niya, mula sa direktor, co-stars hanggang sa production staff.

Puwedeng panoorin ng mga teenager ang Menor de Edad dahil R-13 without cuts ang classification ng MTRCB sa pelikula, kesehodang nakabuyangyang ang likod ni Meg, itsurang may tuwalya na nakabalot sa kanyang hubad na katawan at underwear lang ang suot ng mhin na kasama niya sa eksena.

Tonton walang alam sa encounter nina Maricel at Gerald

Kausap ko si Tonton Gutierrez no­ong Biyernes at wala naman siyang na­banggit sa akin na may problema sa pa­gitan nina Maricel Soriano at Gerald Anderson. Basta ang sabi niya sa akin, may taping siya bukas para sa kanilang teleserye.

Nabasa ko kahapon ang balita na ba­ka hindi matuloy ang Bukas Na Lang Kita Mamahalin dahil sa alleged en­coun­ter nina Maricel at Gerald. Kung may ganoong insidente, sure ako na ma­aa­yos at kung may changes na mangyayari sa taping ay tiyak na nakatanggap na ako ng tawag mula sa executive producer ng show bilang kasali sa drama series si Tonton na alaga ko.

Ni minsan, hindi kami nagkaroon ng problema sa production people ng ABS-CBN dahil maalaga sila sa mga artista at kapag may mga problema na kailangan na lutasin, sinasabi agad nila sa mga tao na involved. Baka sila pa nga ang nagkakaproblema sa akin kapag tumatanggap ako ng mga raket na may conflict sa schedule ng mga taping.