CEBU, Philippines - GARRY: Hello Vatski and Banatanay readers! Kumusta ang imong pagtan-aw sa MMFF, Vatski? Ambot lang kay wala ko mahadlok sa akong gitan-aw nga Shake Rattle and Roll, ambot horror or comedy ba ang akong gitan-aw. Sa laing bahin, samtang nagka-init ang politika sa Sugbu ug sa Kapitolyo, init usab ang binaylo-ay og akusasyon tali ni Sarah Lahbati ug sa management sa GMA 7. Ambot lang ani Vatski, na unsa na ning mga talent sa GMA, mga attitude man? Pwes, kung ako’y Sarah, ayaw gamita ang Twitter, go to court and file a case against GMA aron mapagawas imong gibati. Para nako si Sarah Lahbati bastos ug walay utang kabubut-on! Unsa kaha ang nakapa-aghat kaniya sa iyang kaisog karon? Basin naay nagpaluyo ni Sarah aron magkagubot ang iyang career?
VATSKI: Maayong adlaw, Gar, ug sa tanang mga loyalista sa Banatanay! Pit Senyor pud natong tanan. Grabe na ka-busy ang kadalanan, pasabot nga pipila nalang kaadlaw, Pista Senyor na. Kung unsa kainit ang pagdawat natong mga Sugbuanon, lakip na tong niari gyud og tuyo para magsaulog sa kapistahan sa Batang Hesus, ana pud ang gibati ron ni Sarah Lahbati kabahin aning issue ron nga iyang giatubang. In fairness to her, Gar, naa man pud siya’y rason sa iyang desisyon, mao ang pagbiya sa GMA7. Matud pa ni Sarah gidaugdaug kuno siya sa mga taga GMA7, naay toy higayun nga nag-taping sila nga naabtan na intawon kuno siya og kadlawon bisan og sayo pa unta siya sa gabii kuhaan og eksena. Giisip kuno siya’g pinakaultimo nga artista mao tong naabtan nalang siya og buntag, gani misibat siya para sa iyang guesting sa Eat Bulaga! that day. Ikaw kunoy pahuwaton og taas nga oras, Gar, di kaha mosipok imong ulo? Apan matud pa ni Sarah, kalma ra kuno siya ato’ng panahona, gani nananghid nalang siya nga mobiya sa set para modagan na sa Eat Bulaga! set kay modagan pa man og pipila ka oras ang byahe. Ug sa dihang nakugang nalang kuno siya kay ang nigawas nga balita, nag-walk out kuno siya sa set. Didto napungot ang batan-ong artista ug midisidir nga mobiya nalang sa Pilipinas ug mobalik sa Switzerland. So, kining mga issue against her, kung basihan nako ang mga tweet ni Sarah, makaingun ko nga pagpanaot lang gyud ni kaniya. Matud pa Annabelle Rama kinsa inahan sa uyab ni Sarah ug naluoy sa dalaga, naa kunoy mga feeling gamhanan sa GMA7 ang nagpaluyo aning pagdaugdaug kang Sarah. Sa mga nanggawas nga mga balita, klaro hinuon nga alkanse si Sarah kay giant network ni iyang kontra. Hinaut pa unta nga lingkuran ni nilang tanan para dili modako og samot.
GARRY: Ang atoa, Vatski, naa siya’y kontrata’ng gisudlan sa GMA, pwes iya nang i-follow ug dili mangita pa og unsa’ng alibi ug rason. Intawon sab kamabaw ba uy. Ang iyang mga reklamo ug yangongo, adto na sa korte ipaabot ug kung dili niya kaya pagpakahilom, mao na ang smartest way to do. Dili ta magpadala sa mga hunghung sa gawas. Kaluoy sa iyang career!
VATSKI: Mao sad lagi, Gar. Ang kontrata, kontrata. Busa angay’ng i-honor ni Sarah. Pero og sobra na siguro ang pag-antos sa batang aktres, dili ta ka-blame kung dili na niya tumanon ang maong kasabutan. Dili na sab siguro angayan pa nga after sa nahitabo, mobalik si Sarah sa GMA kay sigurado piti siya didto, or itanggong ba hinuon nga way project. Anugon lang ang iyang beauty. Maayo biya ni siya moarte, humble pa gyud. Nakakita naman gyud ko aning Sarah in person no, dili gyud arti pareha anang ubang artista. Makigstorya ra pud og susama natong mga ultimo, Gar. Maong naluoy ko niya aning panghitabo ron. Dili ko motuo nga nidako na ang iyang ulo kay dili nimo makita nga naa siya anang batasana. But let’s just pray nga maresulbar ra ni’ng isyuha para maka-move on na si Sarah kung asa man gani siya paingun. Anyway, happy birthday sa akong amiga nga si Floramie Angcon. Ug belated happy birthday pud sa akong college friend nga si Cherry Angtud Illosiro (Jan 11).
Pangutana: Unsay reaksyon nimo sa pagkontra ni Sarah Lahbati sa iyang mother network nga mao ang GMA-7? Unsay angayan niyang buhaton?
Text na dear hugyawnatics dungan sa imong ngalan ug address ngadto sa: 0917-9047513. Kutob lamang karong udto (12 noon, January 14) ang pagdawat nato sa inyong mga mensahe dear hugyawnatics, busa text text text na!