Kahulugan

CEBU, Philippines - Gikan sa libro ni Mae “Tata” Abad nga “Beyond Dreams—Hubad Sa Damgo” nga mapalit na diha sa Central Books nga nahimutang sa dalan P. del Rosario, aniay pipila ka kahulugan sa imong damgo ug awom:

Damgo

Artista—Basta artista na gani imong makita sa imong damgo, bahin gyud ni sa imong kapikas sa kinabuhi o’ ang imong uyab. Kung buhi pa ang artista nga naa sa imong damgo ug malipayon, nagkahulugan nga malipayon ang imong relasyon karong panahona ug nagpahibaw lang nimo nga dayga permi ang imong trato o’ imong asawa/bana. Kung makita nimo ang patay na nga artista sa imong damgo, nagpasabot nga wa nay lami ang imong gibati sa inyong relasyon. Gilaayan na ka o’ ang imong pares sa inyong panag-uban. Kinahanglan namo’g kinasing- kasing nga pag-istorya aron matagaan ug sulosyon ang inyong mga gibati.

Bato—Kung ang bato gamay, timaan nga dali ra kaayo ka mahadlok kung naa kay makita nga mas labaw pa nimo. Dili kaayo gahi ang imong desisyon, mo surrender dayon ka! Kung dako ug gahi ang bato imong makita, nagpasabot nga kung unsa imong gusto kab-uton sa kinabuhi, way makapugong! Pero kung natumpag ang bato sa imong damgo nagpasabot nga naay mobuak sa imong kasingkasing o’ motumpag sa imong negosyo.

Bitin—Mao ning damgoha nga dili gyud nako ganahan hubaron, gawas kung mapatay sa nagdamgo. Mga tawo nga maluibon nagpahipi lang kung makita nimo ang bitin nga naa sa imong atubangan. Kung ang bitin yellow nga naay green nagpasabot nga nasina ni nimo ang tawo tungod sa imong kwarta or position sa trabaho o’ basin ikaw ang gisaligan sa imong boss nga maoy mopadagan sa kompanya. Kung ang bitin nagkaon og mansanas, naay makig-atbang nimo sa paghigugma o’ kuyaw nga naay mo-ilog sa imong kapikas. Kung paakon ka sa bitin sa tuhod or buol-buol (ankle) or sa imong may pulso (wrist), timaan nga naay magluib nimo sa trabahoan or kung estudyante ka sa skwelahan. Basin naay nasina nimo kay mas dako kag sweldo or paborito ka sa imong boss, maong magbantay ka.

Kalag—Kung nakita nimo ang usa ka kalag nga wa ka kaila, labi na ug nagtalikod, nagkahulugan nga naay gusto mohangop nimo nga dugay nang nipahuway. Hunahunaa kuno kung kinsa ang suod nimo nga kapamilya ang tua na sa laing kalibutan ug pamisahi dayon inig mata nimo. Nakig-istorya ang kalag nimo apan nagtalikod lang gihapon,nagpasidaan ang usa ka kalag nga mag-amping ka sa mga aksidente. Kung nakaila ka sa tingog, hunahunaa dayon kung kinsa ang dili ganahan aning kaila nimo nga kalag. Naay nagplano ug dili maayo diha nimo ug kini imong kaila nga kalag maoy nakahibaw.

Dagan—Kung nagdagan ka nga wa kay kakapoy ug wa gyud ka nihunong, nagkahulugan nga mouswag na ang imong gipangandoy nga kahayahay sa kinabuhi. Kung nidagan ka tungod kay nahadlok ka sa kangitngit sa kagabhion, nagpasabot nga naa kay kahadlok sa usa ka butang o’ tawo. Kung naa kay umaabot nga interview, gikulbaan nakag maayo. Relax lang aron dili ka makalimot kung unsa imong itubag ug madawat ka sa trabaho. Kung naa kay gikahadlokan nga tawo ug gipasakitan na ka, kinahanglan na ka mosangpit sa imong ka pamilya aron mahunong na ning tanan. Ayaw itugot nga daug-daugon ka kung wa man gani kay tawo nga gidaug-daug.

Awom

Abaga—Magpas-an og mga bug-at nga mga suliran. Kanunay samokon ug kasinahan. Ikaw noh, kusog kaayo ka mopalit og problema sa uban, labi na sa imong pamilya. Bisan dili imoha, imo lang gyud angkonon bahalag mag-aginod na ka.

Pusod—Mapinanggaon, maluloy-on, apan kung ilaron ug binuangan, moulbo gyud ang kaspa sa nangilad.

Bugan—Kung naa sa wala nga bahin, dugokon, kaibgan ug babaye, bakla, lakin-on, byudo, byuda ug bisan pa atong mga tawo nga naay uyab o’ minyo.

Itlog—Palikero, daginoton hasta ang mga bati ug nawong.

Bagtak—Mapinanggaon, sulondon ug gustong magpa-sexy kanunay o’ gustong permi  gwapa/gwapo bisan pag naa sa balay.

Ang interesado nga mupalit og libro mahimo pud mu-text sa: 0922-489-8523. Ang buot magpahubad sa ilang damgo ug awom, mas ganahan si Tata nga inyo kining ipadala niya pinaagi sa email, aron mas klaro ug detalyado. Ang email address: [email protected].