New Year’s Resolution

Happy Sunday! Katapusang Domingo na karon sa tuig 2012 ug duha ka tulog na lang, 2013 na.  Sa kapaspas sa panahon, nakapasalamat na ba ka sa tanang grasya nga imong nadawat karong tuiga? Natuman ba nimo imong mga saad? Mga goals? Imo bang gi review imong New Year’s resolution karong tuiga? Natuman ba kini?

Kay hapit na man nato sugaton ang bag-ong tuig, magsugod na pod ‘ta og hunahuna ug suwat sa atong mga New Year’s resolution. Mao kini ang abutang nga gusto nimong makab-ot ug mahitabo nianing bag-ong tuig.Pero maayo ra man kita sa sugod lang. Unsa may mga pamaagi para ato kining matuman? Aniay mga tips:

1. Dapat klaro ug specific kini - Para mas sayon ug mas dali matuman imong New Year’s resolution, dapat specific ‘ni. Kung ikaw gusto moniwang, dapat imong ibutang kung pila ka pounds imong tangtangon ug kung unsang parte sa imong lawas imong gusto nga tutokan.

2. Dapat imo kining kagustohan – Siguroa nga imoha kining kaugalingon nga gusto ug dili sa uban. Mas dali ug mas mapugos ang imong kaugalingon sa paglihok kay kahibaw kang imong kagustohan.

3. Sultii ang imong pamilya ug mga higala – Dako kaayong tabang kung nakahibaw imong pamilya ug mga higala sa imong New Year’s resolution para naay motabang ug pahinumdom nimo. Mao sad ‘ni sila ang maghatag nimo og motivation nga tumanon imong mga gustong makab-ot.

4. Isulat sa papel, notebook o journal – Makatabang usab ang pagsulat niini imong lista. Pilia kanang pirmi nimo makit-an. Kung ikaw estudyante, mas maayo imong ibutang sa imong notebook para kada abli nimo, imo kining makit-an. Pwede pod kang mogamit og post-its ug ibutang sa mga lugar nga pirmi nimo maagian pareha sa samin, cabinet o computer.

5. Dali makab-ot – Pilia ang imong resolutions nga dali makab-ot o matuman.  Ayaw pagsulat og medyo imposible na sad buhaton. Dapat attainable kini ug mahagit nimo imong kaugalingon.

Manghinaot ako nga kining mga tips makatabang ninyo sa pagtuman sa inyong mga goals ug resolutions sa bag-ong tuig. Hinumdomi usab nga dili kinahanglan magpaabot pa og bag-ong tuig ka mobuhat sa imong mga gustong makab-ot sa imong kinabuhi. Ug karong bag-ong tuig, ayaw ninyo kalimti nga motutok sa GMA7 sa among New Year’s countdown. Ako gihapon ang inyong makauban sa among live nga coverage sa selebrasyon sa Cebu. Sa tanan nakong suki diri, Malipayong Bag-ong Tuig natong tanan!