Baylo Ta

CEBU, Philippines - Ang tinouray nga gugma wala magbase sa gahom o ba kaha bahandi sa usa ka tawo , kini nag-ugat sa tinud-anay nga batasan sa usa ka tawo.

Mao kini ang magdagan nga ideya sa istorya sa umaabot nga teleserye sa CCTN Channel 47 nga “Baylo Ta” nga magsugod na karong January 7, 2012 gikan sa Lunes- Biyenes sa 8:00 hangtud sa 8:30 sa gabii.

Pagabitoonan kini nila ni Aida Patana, Cathy Cabahug, Bruce Garcia, Gregg Lawas, Tess Diez, Konsehal Editha Cabahug sa Dakbayan sa Mandaue,  Jim Carba, Kevin Cabahug, Eman Flores, Epoy Caballero ug Bong Gemino.

Special guests usab sa maong programa  sila si Glenn Soco, Daisy Reyes, Monica Sakay, Dane Zapanta, Nyumi ug sinuwat  kini ni Ronnie Gonzales kinsa mao usab ang direktor niini.

Gawas sa iyang pagkabida sa maong serye, co-prouducer usab si Aida niini kinsa misaysay dinhi sa Banat News nga dunay mga eksena sa maong serye ang gi-shoot didto sa Hong Kong.

Suma pa ni Aida nga seguradong makauyon gyud ang masa sa Baylo Ta sanglit seguradong makakuha gyud og leksyon ang mga tawo niini.

Matud pa niya nga kinahanglan nga dili gyud huna-hunaon ang istado sa tawo sa pagpili og hinigugma.

Nagkanayon si Aida nga nahuna-hunaan niya nga mo-produce sa maong serye sa dihang nakasalmot siya og recollection sa Oasis of Love nga gipasiugdahan sa CCTN diin dunay miagni kaniya nga mosulod sa natad sa pag-arte atubangan sa kamera. Guest ra unta siya sa Dear Tatay episode, apan nadasig siya nga magco-producer, sanglit ganahan gayud siya og teleserye kaniadto pa.

Tumong usab niya nga matabangan ang talentong Bisaya nga dunay ikabuga ang panagway ug may potensyal nga mamahimong maayong mga artista ugma damlag.

Maukay pa ang mga katawhan sa istorya sa usa ka lalaki nga puwerting datoa kinsa nangita og babaye nga mopangga kaniya apan wala gasalig sa iyang katigayonan.

Puwes gibuhat sa maong lalaki mao ang pag-usab sa iyang imahe, gipagawas niya sa katawhan nga usa siya ka pobre ug ang iyang drayber maoy gipakaron-ingon niya nga adunahan.

Sa maong pamaagi, iyang masukod kung unsa ang klase nga babaye nga modawat sa iyang pagkatawo.

Samtang ang usa sa mga banggiitang aktres sa Sugbo nga si Tess mibutyag dinhi sa Banat News Hugyaw nga palahi na pud ang tirada sa maong serye  gumikan kay naandan na sa una nga kanunay magpakita sa kapobrehon.

Matud pa niya nga linahi napud niiining higayona, sanglit bawion lang kini sa istorya kung diin dunay makuha nga pagtulun-an ang mga viewers.

Samtang niadtong Lunes sa gabii, hingpit na nga gilusad ang Baylo Ta diha sa Fuente Osmeña Oval diin naghugop ang mga tawo. Mas daghan pa unyang umaabot nga promotion para sa maong teleserye sama sa mall shows ug guesting sa nagkadaiyang mga salida sa CCTN.