Sa presscon ng One More Try, sinabi ni Direk Ruel Bayani na naiiba ang pelikula dahil kumplikado ang problema ng mga karakter nina Angel Locsin, Angelica Panganiban, Zanjoe Marudo, at Dingdong Dantes. Masuwerte siya dahil ang gagaling umarte ng kanyang mga artista na posibleng manalo pa sa best actress category at hindi pahuhuli sa akting ni Nora Aunor sa Thy Womb.
Sinabi ni Angel na ngayon lang siya gumawa ng ganito ka-mature na pelikula kung saan ang role niya ay may asawa at may anak na may sakit.
‘‘Hindi ko na iniisip ang tama o mali, maging moral o immoral basta’t priority ko ang kapakanan ng aking anak,’’ sabi ng aktres.
Hindi rin ipagdadamot ni Angelica ang kanyang asawa basta’t mabuhay lang ang isang bata na anak ng kanyang asawa kay Angel.
Kumusta naman ang love scene nila kay Dingdong?
Hanga ang dalawa sa kanilang kapareha dahil iisa lang sinabi nila tungkol kay Dingdong.
Say ni Angel, ‘‘Sobrang maalaga si Dong sa kanyang kapareha. Bago simulan ang love scene ay nagtatanong ito ng ‘Okay ka ba?’ Bilib ako sa kanya dahil inuuna niya muna ang kapakanan ng kapareha at ’di siya nagte-take advantage kaya komportable ako sa aming love scene.’’
Sabi naman ni Angelica, ‘‘Sobrang gentleman niya at protective sa kapareha. Naroon ang respeto niya sa babae.’’
Nag-showdown ang dalawa sa aktingan, ayon kay Direk Ruel at itinodo na nila ang iyakan sa ibang eksena.
Kasama pa rin sa dramatic masterpiece sina Carmina Villarroel, Agot Isidro, Edward Mendez, at Gina Pareño. Ang One More Try ang isa sa walong official entries sa Metro Manila Film Festival 2012 mula sa Star Cinema.
Marian producer na
Sa Christmas party ng Luminary Talents ni Popoy Caritativo ay nakausap ng entertainment press si Marian Rivera at dun niya sinabi na magpo-produce siya ng isang action-comedy na wala pang title na kasosyo ang isang Kapamilya actor.
Baka mag-co-produce sila ni Dingdong Dantes ng isa ring proyekto after Tiktik. Agostodos ang film outfit ng BF kaya may nag-suggest kay Marian na gawin niyang Agostodose Productions dahil ito naman ang kanyang kaarawan.