Gratis et amore pag-uli nga may pasalamat

CEBU, Philippines -  Daghang  tawo  nga nasinati na  kaayo  sa ulohan  ning maong  lindog  ug  sayon  kaayong  moila  niini, mohatag  og  personal  nga  kahulogan, mahimong nasinatian  usab  nila  sa ilang  kinabuhi. Busa  maoy  hinungdan  nga akong gipili  kining  maong lakbit-pulong nga  maoy  ulohan  ning  dyutay nga paghandom  nga buot nakong  pasaw-an  sa  katawhan. Gusto  nako nga kauban  ako  sa bagang  pundok  sa  katawhan kinsa daghan  kaayo  og  ikapasalamat  sa Dios, ilabi  na sa kamauswagon  sa iyang  kinabuhi   .

 Ang akong  kinabuhi yano lang ug hayahay. Bisan  ako  may kaugalingong  bahin  sa dagkong  mga  hagit. Ang pagbanhaw sa The Freeman  niadtong  1965, ang  pamantalaan  nga  gitukod sa akong  dugay  nang  mitaliwan  nga  si tiyo Paulino Gullas  niadtong  1919, di tiaw ang akong sakripisyo. Ang pagbanhaw sa UV Chorale  nga gitukod  sa akong inahan, nga si Inday Pining Rivera Gullas nga gihalaran  usab nako og mga pag-antos ug   pailob.

Unya giatubang pa  nako ang sulirang  medikal. Di  pa dugay nasinatian nako ang hilabihang kasakit ug kasubo gumikan  sa pagkawala sa akong 13 anyos nga mahal kaayo nakong  apo gumikan sa usa ka aksidente.

Apan  taliwala  niining  tanang  mga  hagit wa ko mawad-i  og  pagsalig  sa pagtuo  nga  ang  Dios  pinaagi sa matinud-anong  pag-ampo, kanunay’ng andam  nga motabang, bisan  sa mga kahimtang  nga  imposibli kaayong huna-hunaon.

Alang  kanako ang laing  dakong hagit  nga akong  giatubang mao  ang pagpadala  nako  sa UV Chorale  ngadto  sa Europe, di lamang alang  sa ilang kaugmarang personal ug propesyon, apan  labaw  sa tanan  ang  akong mapaubsanong tampo  sa usa ka dakong selebrasyon sa  kanonisasyon  sa  ikaduhang Filipino  ug unang Sugbuanong  Santos  nga si San Pedro Calungsod.

Ang unang higayon  nga nasayran  nako  nga ang gipanalanginang Pedro Calungsod maoy pipila  niadtong gibayaw  sa pagka-santos  didto  sa Rome niadtong  Oktubre 21,  mao  nga ako  ug  ang akong asawa  nga si Nena mitambong  og  misa diin nakita namo   sa tanang  lugar ang Shrine sa bag-ong santos  sa sulod sa hawanan sa Cebu Archbishop’s Palace. Akong  gihatagan  og  kahulogan  ang  maong  higayon  nga  usa  ka inanay  nga  pag-awhag kanako  alang  sa akong  pakiglambigit sa maong  gimbuhaton.

Tinuod gyud, si Msgr. Ildebrando Leyson, kinsa dako  kaayo  og  bahin  sa kanonisasyon  ni San Pedro Calungsod, wa madugay  misugyot  kang  Nena ug  kanako  nga  labing  maayo  kun  magkasabot  kami alang  sa UV Chorale nga makatambong  ug makaawit  sa adlaw  sa kanonisasyon  didto  sa Rome, kay matud pa niya  nasiguro  niya nga  ang  grupo  makakanta gayud  sa  usa  sa  mga Triduum Masses alang sa akto  gayud  nga kanonisasyon. Gawas  niini  si Msgr. Ilde mipasalig usab  nga  siya maoy makigsabot  aron ang choir makahalad gyud  og awit atol sa paniudto  sa mga dignitaryo  sa adlaw  gayud  sa kanonisasyon.

 Sa maong   higayon  kami si Nena mihunahuna  sa  maong  tanyag  sa among pagpamauli  sa balay. Tataw kaayo  nga  usa kadto ka dakong hagit alang  kanamo. Among gihunahuna  kun asa kami  mangapkap og  kuwarta nga magasto alang sa biyahe sa 32 ka miyembro  sa choir  paingon  ngadto sa Europe busa gibati  kami  og kabalisa  nga nahisama kami sa gibukotan og basa nga habol nga  nakapahuyhoy  sa among  abaga. Ang tahas bug-at  kaayo  nga nakapahinumdom kanako  sa mga pulong  sa akong anhing  amahan, nga si kanhi Don Vicente Gullas nga nagkanayon, “Ang labing masakit  nga pulong sa pinolungang  Eninglis mao  ang “it might have been” (maayo unta).

Sa laktod, samtang  ang hagit  lisud  kaayong kab-uton, apan  bisan  pa niini naglisud ako pagsabot sa akong kaugalingon  kansang kinabuhing nahibilin magbasul  pa bahin  sa giingon  nga "maayo unta”. Sa laing bahin, kun si Dodong makatigom sa gikinahanglang  kantidad   nga  sarang ikagasto  sa pag-adto  sa grupo  sa Rome, usa kini ka kasinatian  sa tibuok  kinabuhi alang  sa UV Chorale- nga  mokanta agi og duyog  sa pagka-santos  sa unang Sugbuanon. Ang  labing mahinungdanon, dad-on  nila  ang tingog  sa  mga Sugbuanon  ug  sa tibuok nasud  nga Pilipinhon  ngadto  sa usa  ka dako kaayong  kalihokang relihiyoso  sa kalibotan, hinungdan  nga si Nena ug ako misanong  sa maong  hagit.

Unya  gidapit  ako ni Msgr. Roberto Alesna, ang parish priest sa  Cebu Metropolitan Cathedral ug usa  sa nag-unang  opisyal sa simbahan nga  mipahiluna sa mga  butang alang sa kanonisasyon sa pagsalmot  sa usa  ka special  finance committee nga gitahasan alang  sa pagkaplag  og  pundo alang  sa usa ka dakong  selebrasyon.

Busa, gawas  sa pagtigom  og  pundo alang  sa UV Chorale, dinhi gitawag  ako  sa usa  ka katungdanan alang  sa  susamang  tahas  apan  sa laing katuyoan  ug  tumong, ang  alang sa kanonisasyon  ni  Pedro Calungsod. Tataw kaayo  nga  murag ang akong  mga kamot puno kaayo. Apan  dihang nahinumdoman  nako  ang  gipamulong  ni Cardinal Vidal kinsa nagkanayon  nga si San Pedro Calungsod  usa  sa 400 ka  mga  gitugpo nga himoonong santos, akong nahunahunaan ang kadaghang   mokandidato sa pagka-santos.

Si San Pedro Calungsod nakatampo  sa paghatag  og  daghan  kaayong  mga hunahuna  ni Nena ug  ako hangtud  nga  kami nakahukom, nga  kinahanglang mosalmot kami  sa bililhon kaayong  kalihokan. Ug motuo mo  ug  sa di, bisan sa kabug-at  sa maong gimbuhaton nga  gipatong  sa akong  mga abaga  walay  laing  kapaingnan  gawas sa  pagpangayo   og  panabang  sa espiritu  santo.

Di ko makaako  nga ang  choir ug  ang mga Sugbuanon malusno. Ang UV Chorale  daghan  na kaayo  og  mga kasinatiang  international, nga  namauli  nganhi  sa nasud dala  ang daghan  kaayong pasidungog  nga  nahimong  nag-una  sa natad  sa bangga  sa pag-awit  sa tibuok kalibotan  didto  sa Busan, South  Korea, maingon  man sa Tomhonm Indonesia. Mikanta usab   sila  atol sa World Youth Day  sa  Sydney, Australia niadtong  tuig 2008  ug nanganta  usab sila  atol  sa  College  of Cardinals  nga gitambongan  sa mga  miyembro  niini  ug  mga obispo. Makalingaw  kaayo  ang  ilang  pasundayag busa gidapit sila sa Cardinal of Vienna nga  kun  makaabot  sila didto  sa Austria, ikasangka  usab   nila ang ilado na kaayong Vienna Boys Choir. Tataw   kaayo nga ang  usa  ka pasundayag  didto  sa Rome alang  sa kanonisasyon ni San Pedro Calungsod  takdo  unta  kaayo  nga  labi pang  mohatag  og  dugang  dungog  sa UV  Chorale. Gumikan  niini  kami si Nena misugod  dayon  sa among laraw . Ug  ang  paghimo  sa ingon usa ka labing sakar  ug  haum  kaayo  nga naghatag og  dugang  kahulogan sama  sa usa ka panultion  nga nagkanayon “charity begins at home” (ang buhat  sa kaluoy  magsukad sa   panimalay).  

Busa gitugotan  namo ang choir nga mangharana  sa tibuok  komunidad  sa UV  ug mao kadtoy sinugdanan  sa pagtigom  namo  og salapi. Tungod kay si Nena ug ako nakahukom nga  di angay  palabyon  ang  higayon  nga  kinahanglang  atua  gyud  ang choir sa adlaw  sa kanonisasyon ni San Pedro Calungsod tungod  kay  gikinahanglan  gyud nga makakanta  sila sa ngalan  sa mga Sugbuanon.

   Apan sa  paningkamot  nga makabaton  kini  og katumanan    sa ngalan  sa tibuok  nasud, usa na kaayo  ka  maayong  dungog  ang  makab-ot  sa tanan ug  dili  maisip  nga usa  ka way  bili  ang  maong kalihokan.

Unya  luyo niining  tanan, makaingon  ako  karon  nga  bisan  sa kalisud  sa  mga hagit   nga  mihadla  kanako, naisip  gihapon nako  ang akong kaugalingon nga suwerte  kaayo. Ug  ang  pagtambong sa kanonisasyon sa usa ka santos  gikan  sa  usa kanato, alang kanako usa kini ka labing maayong hatag  sa Dios niining iyang ubos  nga ulipon.

Maoy hinungdan  nga si Nena ug ako mitakda  og  usa ka imbitasyon sa among mga pinili uban  sa UV Chorale ug pasaksihan ang kanta sa grupo atubangan  sa mga suod  nga  mga higala ug  pamilya, ug ang tanang  mihimo nga posibli  niini. Sama  sa ulohan  niining  maong  lindog, akong gi-awhag  ang usa ka mini-concert ug reception “Gratis et Amore, pag-uli  nga may pasalamat."        

Busa  kadtong  tanang mitandog  sa akong  kinabuhi sa nagkalainlaing  paagi  ug  mihimo kanako  nga  maayong tawo  sa mata  sa Dios ug  sa akong isigkatawo-daghan  kaayong  salamat ug maayong pasko.