Nitunob na kita sa buwan sa Disyembre, mapahiyomon na kaayo ang atong mga panagway kay nagkaduol na usab ang Pasko. Sa mao man gud nga okasyon, kanunay kita nga sadya ilabi na nga saulogon nato ang adlaw nga natawhan ni Hesus.
Kay nagkaduol naman gyud ang Pasko, ania pu’y mga tips kung unsa ang atong buhaton kung duna kita’y natigom nga kuwarta.
Ibayad sa utang
Dili gyud malikayan nga dunay mga panahon nga makautang kita sa atong mga higala ilabi na sa panahon nga nanginahanglan kita. Apan ang uban kanato, adto moutang sa mga lending firm busa sugdi og bayad ang mga dagkong interest rate, ug imoha gyud kini og anam-anamon og bayad. Kung mabuhat ni nimo, mosamot kasadya ang imong Pasko gumikan kay wala ka naghuna-huna og daghang balayrunon.
Pag-invest
Kung naay sobra sa imong nadawat nga bonus, i- invest ni kung tan-aw nimo safe ug mapahimuslan ang imong kwarta. Apan dili mokompyansa ug dili magpataka og invest gumikan kay karong panahona, nagbaha ang mga mangingilad ug mapahimuslanong tawo. Imoha gyud nga tun-an ang kompanya o grupo nga saligan nimo sa imong kwarta, kay ingon pa nila “nasa huli ang pagsisi”.
Pagahin og emergency fund
Kanunay ka mohipos og kuwarta ug dili kini gastohon sa dili kaayo importante nga mga butang. Kung dunay emerhensya nga mahitabo kanimo, dili ka magkapuliki og pangita og kuwarta.
Hatag pud bisan ginagmay
Kung nakabayad na sa utang, naka-invest na ka, ug nakahipos na ka og emergency funds, good job! Paghuna-huna na og ihatag nimo nga regalo sa imong mga minahal sa kinabuhi. Apan ang labing nindot, mas maayo nga mohatag ka sa tawo nga labing tabanganan. Gumikan kay ang pagtabang sa mga tawo nga nagkalisod maoy usa sa tinud-anay nga kahulugan sa Pasko.
(Madungog si Don Romantiko sa 95.5 Star FM, Lunes hangtud sa Biyernes pinaagi sa programang Evening Starsweep 6-9pm)