Maja nakahilak pagkita ni Jennifer

CEBU, Philippines -  Gibayaw sa kalipay ang  young actress nga si Maja Salvador sa dihang nahimamat gyud niya sa personal ang sikat nga international singer nga si  Jennifer Lopez.

Nagkaabot ang duha niadtong  Lunes sa  hapon, sa wala pa ang  concert sa  international superstar.

Gikonsiderar ni Maja ang maong adlaw isip  "happiest day" sa iyang kinabuhi.

Nasayran sa aktres nga ang giistaran niya nga  hotel niadtong higayona, mao pud diay ang giistaran sa  singer-actress busa nagdugay-dugay gyud siya og check-out sa pamasin nga iyaha kini nga makit-an.

Nakadungan ni Maja  ang  mga dancers ni Jennifer sa gym sa hotel. Samtang nakadungan usab niya sa swimming pool ang mga anak ni Jennifer nga sila si Max ug Emme.

Pag-abot sa hapon,  nataymingan na gyud ni Maja si Jennifer   sa locker room  kung diin padulong kini sa hotel gym.

Nakahilak matud pa ang aktres gumikan sa kalipay ug kakulba nga nakit-an niya ang international singer.

Dali nga nisaka si Maja sa iyang kuwarto aron mag-ilis ug mibalik sa gym  kung diin kauban ni Jennifer ang  boyfriend niini nga si Casper Smart.

Pag-una, gidid-an si Maja sa  security ni JLo  nga  magpa-picture  sa singer apan gihangyo niya kini pag-ayo.

Sa dihang migawas na sa  gym si JLo  ug gihangyo kini pag-ayo ni Maja nga magpahulagway silang duha. Mitubag matud pa ang international singer og , "Can you just meet me downstairs because I'm kind of a mess right now?"

Apan nagpakaluoy pag-ayo si Maja hinungdan nga misugot si Jennifer sa hangyo sa aktres.  Paghuman niadto, nagsiyagit-siyagit si Maja paingon sa iyang kuwarto gumikan sa tumang kalipay nga nahimamat niya ang iyang idolo. (Sanden J. Anadia)