Ang Tariman Brothers

CEBU, Philippines -  Dili nako taason kining istorya nako rong adlawa, aron dunay espasyo ang akong editor para sa hulagway nga gipataban nako dinhi. Hulagway sa Tariman Brothers. Kay walay dull moments sa among set. Kun ania kini silang upat, sila si [from left to right], ang kaluha, Rey ug Roy, Philip Tariman 111 kon Junjun ug Christian]. Kay pulos hingatawa ug daw walay mga kasakit ug kasuko. Labi na kini si Rey. Makita man tingali sa dagway niya nga mora’g walay gitawag og hang-ups. Nilang upat, si Christian ra ang interesado sa showbiz. Apan tungod lagi kay filmmaker ang amahan nga si Pepe [Pinglac], wa sila makalikay. Gani, si Roy dili gyod unta mag-showbiz. Gipalabi ang pagtungha ug pagpaugnat sa kusog. Hapit gani mahimong basketball player sa UV. Apan miabot gyod ang script ni writer-director Edmund Lagahid nga nagkinahangla’g kaluha. Kinsa may kuha-on sa producer nga si Pepe? Naay ubang kaluha, dili man mga gwapo. Kinahanglan man mga gwapo. Kay gwapa ang inahan, si Mandaue City Councilor Edith Flores Cabahug, ug ang amahan, gwapo, si Ehpoy Caballero, igsuon ni Talisay City Councilor Danny Caballero.