Unang pretty mama 2012, gikurunahan

CEBU, Philippines - Gikan sa 74 ka mga aplikante nga gustong  mamahimong labing unang mananaog sa The Search for the  Compleat Woman, My Pretty Mama 2012, 15 ka mga maanyag nga inahan ang napili isip opisyal nga mga kandidata kinsa nagtigi sa titulo diha sa Montebello Villa Hotel niadtong Nobiyembre 18, 2012 sa alas otso sa gabii.

Napuno sa kulbahinam ang maong prestihiyosong kompetisyon diin  ang mga  nagkadaiyang supporters sa mga kandidata  nagdala sa ilang tagsa-tagsa ka mga placards, confetti ug uban pa isip pagsuporta sa ilang paboritong kandidata.

Human sa pila ka buwan nga gibansay ang mga kandidata  pinaagi sa ilang mga nagkadaiyang  talento, gipakita sa mga kandidata ang ilang kaanyag ug kamaayo sa pagdala sa ilang kaugalingon pinaagi sa pagrampa atubangan sa katawhan.

Si Cebu City Mayor Michael Rama mipadayag sa iyang suporta pinaagi sa pagtambong ug pagharana sa mga kandidata. Mapasalamaton ang mayor tungod kay adunay usa ka kompetisyon nga naghatag og kahigayunan sa mga inahan nga ipakita ang ilahang mga talento bisan minyo ug aduna'y mga anak.

Ang Contestant No. 15 nga si Mrs. Jessica Eribal ang gikurunahan isip  labing unang mananaog sa My Pretty Mama 2012. Si Jessica nagpakita sa iyahang talagsaong kaanyag ug abilidad sa pagtubag sa mga pangutana.

Si Jessica sab ang aduna'y daghang special awards sama sa Ms. Photogenic, Best in Long Gown, Ms. Biogenic, and Ms. Freeman News 'Readers' Choice.

Si Jessica nakadawat og P50,000 samtang P30, 000 sa First Runner-Up ug P20,000 sa Second Runner-Up. Ang ubang kandidata nakadawat og consolation prizes.

Ang ubang mananaog mao sila si Aljaene April Faith Gamotea (First Runner-Up); Ms. Daisy Carpio (Second Runner-Up); Ms. Hannah Whelehan (Third Runner-Up); and Ms. Charisma Guerrero (Fourth Runner-Up).

Gilingaw sab sa mga kandidata ang katawhan pinaagi sa pagsayaw sa usa sa mga trending  Korean song ang Gangnam Style. Ilang gipakita nga bisan mga inahan na sila makasunod pa gihapon sila sa uso.

Nag-unhanay sa pagkuha sa ilang mga digital camera ug cellphone ang ubang mga tawo  sa dihang miabot ang sikat nga si Anabelle Rama diin usa siya sa mga judges. Ang uban wa mapugngi ang kalipay ug mihangyo nga magpalitrato kini kang Anabelle.