Queen of Cebu 2012: Nasuklian nga Determinasyon

CEBU, Philippines - Ang team manager sa usa ka call center company ug gradwado sa kursong business administration  nga Vanity Kintanar Salinana maoy napili nga Miss Queen Universe 2012 adtong Biyernes sa gabii..

Nagkanayon si Vanity nga wala niya damha nga maangkon ang korona gumikan kay puros gyud lig-on ang mga kanidata sa nahisgutang indigay.

Suma pa niya nga katulo na kahigayon nga ni-audition siya sa Queen of Cebu sa milabay nga mga tuig apan wala gyud siya mo-surrender busa dako ang iyang pasalamat nga niining higayona, naangkon na gyud ang gipangandoy niya nga korona.

“Wala gyud ko mag-expect, basta happy kay ko ug nagpasalamat ko’g maayo sa tanang ni-support nako,” suma pa ni Vanity kinsa mao usab ang napili kaniadto nga Miss Gay Mandaue 2010.

Tubong Baclayon, Bohol si Vanity ug mitikang siya sa Sugbo sanglit dinhi siya sa Sugbo nagtungha kaniadto sa kolehiyo ug dinhi na lang pud siya nanarbaho.

Gipahibalo usab ni Vanity nga dili lalim ang preparasyon niya sa pagsalmot niya sa Queen of Cebu gumikan kay kinahanglan gyud niya ang pagkontrol sa iyang kaon ug matag adlaw usab siya nga mag-gym.

“Akong gibuhat kay mag-exercise ra gyud , unya basa  og mga magazine ,” matud pa ni niya.

Dili pa mahimo nga mosalmot si Vanity og laing indigay dinhi sa nasud apan mahimo siya nga makaapil og mga international pageant ug usa kini sa iyang gitun-an karon.

Giisip niya nga usa ka prestihiyosong indigay ang Queen of Cebu gumikan kay nakatabang usab kini sa komunidad pinaagi sa paghimo og mga charity works.

Daghan usab ang nahugyaw sa pipila ka mga production numbers sa Queen of Cebu 2012  gumikan kay gilangkoban kini sa nagkadaiya nga mga festival dinhi sa Sugbo.

Wala usab magpaulahi sa ilang nga song numbers ang mga Sugbuanong singers nga sila si Anna Fegi ug Maria Donna.

Ug katapusan nga mihalad og awit ang Asia’s Song bird nga si Regine Velasquez kinsa miawit og Last Dance ug Dadalhin Kita sa Aking Palasyo.

Daghan ang nahugyaw ni Regine gumikan kay sa tunga-tungang bahin sa iyang pagkanta, gihubo niya ang iyang sandal aron makatarong siya og sayaw sa entablado.

Midugang sa kamabulokon sa maong kagabhion mao ang host nga si Jude Bacalso uban usab sa mga hurado nga sila si  Venus Raj, Mariquita Salimbangon Yeung, Tessa Prieto Valdez, Marguerite Lhuillier , Mark MacMahon, Michael Carandang, Ferdi Salvador, Alice Eduardo ug Marissa Laude.

Atol sa maong pageant, gipahimug-atan usab ang pagpasar sa konseho sa siyudad sa Sugbo sa Anti-Discrimination Ordinance  nga gihimo ni Konsehal Alvin Dizon ug pormal na nga gipirmahan ni Mayor Michael Rama dili pa lang dugay.

Nagsidlak-sidlak usab ang  presenya sa milabay nga mga mananaug sa Queen of Cebu nga sila si Rain Villagonzalo (2009), Maki Eve Mercedez (2010) ug  Bee Urgello (2011).

Major Awards

Queen of Cebu Universe 2012 -Ms. Paraguay, Queen of Cebu Tourism 2012 - Ms. Honduras, Queen of Cebu International 2012 - Ms. Croatia, Queen of Cebu World 2012 - Ms. Portugal, Queen of Cebu Earth 2012 - Ms. Kazakhstan

Top 10

Philippines, Paraguay, Bulgaria, Croatia, Ukraine, Honduras, Costa Rica, Portugal, Kazakhstan, Chile

Minor Awards

Miss Talent - Ms. Ivory Coast, 2nd Runner up (Talent) : Ms Bulgaria, 1st Runner up (Talent): Miss Philippines, Miss Congeniality -  Ms Croatia, Miss Photogenic - Ms Ukraine, Miss Confidence Smile - Ms Ukraine, Miss Facebook Darling Award - Ms Kazakhstan, Miss Ralphs Wine and Spirit - - Ms Kazakhstan, Best “It” Figure - Miss Philippines, Best in National Festival Costume - Ms Paraguay, Best in Costume - Ms Paraguay, Best in Swimsuit - Ms Philippines, Best in Funwear - Ms Vietnam, Best in Evening Gown - Ms Paraguay