MANILA, Philippines - Pagtatagpuin ni Kuya Kim ang mundo ng siyensya at pananampalataya sa kanyang pagpapaliwanag sa mga katotohanan sa likod ng pagsapi ng mga masasamang espiritu sa katawan ng tao sa espesyal na Halloween episode ng Matanglawin.
Samahan ang Trivia King sa kanyang pagtuklas sa mga sandata at ritwal na ginagawa sa exorcism o paraan ng pagpapaalis ng masamang elementong kumokontrol sa isang nasapian. Aalamin niya rin at ibabahagi ang kung bakit at paano nga ba nasasapian ang isang nilalang.
Sa kanyang pagtuklas, malalaman niya rin ang iba’t ibang kuwento o insidente ng sinapian na talagang nangyari sa totoong buhay.
Taun-taon, nasa 1500 tao raw ang sinasapian ayon sa ulat ng CNN. Kaya naman maging ang simbahang Katoliko ay handa rito at bumuo ng sangay para sa exorcism.
Nakapanayam ni Kuya Kim sina Father Jocis Syquia and Father Jojo Zerrudo, mga pari mula sa Office of Exorcism, at isiniwalat ng dalawa na mas nakakatakot pa raw ang tunay na mga kaganapan sa likod ng exorcism sa totoong buhay kumpara sa napapanood natin sa mga pelikulang tulad ng The Exorcist at The Exorcism of Emily Rose.
Tunghayan ang makatindig balahibong Halloween special ng Matanglawin ngayong Linggo (Oct 28), 9:15 AM sa ABS-CBN.