Mag-share kanunay og pagkaon

CEBU, Philippines - Gibutyag ni Kim Chiu nga kanunay sila nga mag-share ni Xian Lim sa balon niya nga pagkaon sa set sa serye nila nga Ina Kapatid Anak.

“Hindi naman ako ang nagluto pero pinapadalhan ko siya ng Tupperware ko. Shineshare ko lang baon ko. Siya parang tinatanong niya lang ako kung kumain ka na ba? Ano ang gusto mong kainin. May isang beses sinabi ko gusto ko ng lugaw. Nasa kami, sa kawalan, tapos nakahanap siya ng lugaw. Lugaw na pang maysakit ha? Pero at least lugaw,” nagkanayon si Kim ngadto sa push.com.ph.

Subling gitataw sa aktres nga dili pa sila uyab ni Xian apan aminado siya nga doul sa iyang kasing-kasing ang aktor.

Ara napungot sa pagpinaabot

Napungot na si Ara Mina gumikan kay hangtud karon, wala gihapon siya’y nadawat nga update kalabot sa istado sa kasong libel nga iyang gipasaka ngadto sa igsuon niya nga si Cristine Reyes.

Wala gaaway uy!

Gihimakak ni Ate Gay ang tsika nga matud pa nga gigamit niya ang isyu kalabot sa giingong away nila ni Vice Ganda alang sa promosyon sa iyang first major concert ug dugang pa niya nga dili tinuod nga nagkabangi sila sa TV host.

Sam nakulbaan

Gibutyag ni Judy Ann Santos nga nakulbaan pag-ayo ang co-star niya sa seryeng Against All Odds nga si Sam Milby sa dihang gibuhat ang usa nila ka eksena apan nikalma dayon kini human gitambagan niya nga mo-relax ug dili angay nga makulbaan.

Zac nakatabang sa turismo

Daghang mga turista ang na-intresado nga mobakasyon sa Pilipinas gumikan sa positibong paghulagway ni Zac Efron kalabot sa nasud sa dihang mi-guest kini sa talk show ni Ellen DeGeneres.

Louise andam makighalok og babaye

Kasamtangang gihuman karon ni Louise delos Reyes ang shooting sa indie film na niya nga Basement kung diin midala siya sa papel isip tomboy apan iyang giklaro nga wala siya’y kissing scene sa babaye sa maong proyekto, hinuon bukas siya sa maong eksena kung gikinahanglan gyud sa istorya.

Ingon nagbuwag?

Nakit-an nga nagkuyog sila si Vic Sotto ug Pauleen Luna sa Alabang Town Center sa miaging adlaw. Ang duha gidungog kaniadto nga nagbuwag busa daghan ang nagduha-duha sa tinud-anay nga istado karon sa duha.

Joko mag-bokal

Ni-file sa iyang certificate of candidacy si Joko Diaz sa buhatan sa Comelec sa miaging adlaw ug midagan siya pagka-board member sa lalawigan sa Batangas.

Kever sa isyu

Wala na gyud nagpapugong si Roderick Paulate sa subli niya nga pagdagan pagka-konsehal sa Quezon City ug gitataw sa aktor nga dili na siya madala og mga intriga hinungdan nga nagpapili siya pag-usab sa iyang posisyon.

Anjo mibalik sa politika

Nibalik na sa politika ang aktor nga si Anjo Yllana ug nidagan siya pagka-konsehal sa Quezon City. Kahinumduman nga nahimo nga konsehal si Anjo sa maong dapit kaniadto sulod sa tulo ka termino

Sure winner

Nahugyaw ang mga konstituwente ni Manny Pacquiao gumikan kay wala siya’y kontra pagka-kongresista sa usa ka distrito sa Sarangani Province. (Sanden J. Anadia)

Nicki: Mariah bakakon!

Gipadayag ni Nicki Minaj nga na- insecure lang kaniya si Mariah Carey gumikan kay miingon matud pa ang mga producers sa American Idol nga human ni Simon Cowell, si Nicki ang “ best judge” nga ilang nakuha alang sa maong show.

Sa Twitter account ni Nicki , giingnan niya si Mariah nga usa ka bakakon gumikan sa mga gipanulti niini batok kaniya.

Usa sa istorya nga miulbo sa miaging adlaw nga   matud pa mihulga si Nicki nga pusilon niya si Mariah.

Samtang ang laing hurado sa American Idol nga si Keith Urban misaysay nga susama siya og United Nations nga napiit sa away sa duha niya ka mga kauban sa maong show.

P500k ni Kitchie gikawat

Padayon karon nga gipangita sa kapulisan ang katabang sa singer nga si Kitchie Nadal nga gikawatan og mga mahalong butang ug kuwarta sa balay niini sa San Antonio Village , Makati.

Matud pa sa singer nga moabot ngadto sa P500,000 ang danyos sa iyang salapi ug butang ang nahanaw sa miaging adlaw.

Nagkanayon si Kitchie nga posibleng weekends nahitabo ang pagpangawat apan sa miagi pa lang niya nadiskubrehan ang insidente human siya nahibalik gikan sa General Santos City.

Ang singer mismo ang miila sa iyang katabang nga si Andrea Rafael, 50, isip gidudahan niya nga suspek sa nahitabo ilabi na nga wala na kini mipatim-aw kaniya.