CEBU, Philippines - Moderno na ang panahon karon, apan sa nanlabay nato nga paghisgot-hisgot dinhi sa okRYAN, it turned out nga daghan pa gyud diay sa mga kababay-an karon ang naghatag og igong gibug-aton sa ilang virginity, daghan pa gihapon ang supak sa pre-marital sex, ug daghan pa gihapon ang kumbinsido nga ang maong butang kinahanglan nga ihatag ngadto ra gayud sa lalaki nga imong minyuan, human pud sa inyong kasal. Pakpak!
Taliwala niining maong maanindot nga kamatuoran nga gitipigan sa mga okRYANians, may kalibog nga naumol sa akong hunahuna: Kung daghan ang supak sa pre-marital sex, nganong daw nawala naman ang naandan nga kinahanglang mamisita gayud ang lalaki sa panimalay, kinahanglang mahashasan una sa mga ginikanan ug kadugo ug kinahanglan mulanat pa og pipila ka buwan una pa sugton? Unsa kadaghan ba ang nagtamod niining maong tradisyon sa modernong panahon karon? Pakkk!
Pila man ninyo ang mapasigarbuhong mupahibawo nga nagkauyab mo human mo gipangulitawhan gayud sa lalaki pinaagi sa pagpamisita sa inyong tagsa-tagsa ka panimalay ug human usab sa daghang pagtimbangtimbang ug pagpaminaw sa pinitik sa inyong mga kasingkasing? Pila man usab kaninyong mga lalaki nga nagbasa niining okRYAN karon ang matinud-anong muangkon nga girespeto ninyo ang babayi nga inyong gimahal, busa wala kamo manguyab pinaagi sa text message, hinunua nagsakripisyo gayud kamo pinaagi sa pagbalik-balik sa balay sa inyong hinigugma aron pamatud-an ang kamatinud-anon sa inyong tinguha? Ug pila man usab kaninyong manag-uyab nga nagbasa karon ang muangkon nga nagsugod mo sa text-text unya pagkita ninyo, uyab na dayon? Labaw sa tanan, pila man usab kaninyong mga lalaki ang wala magtinguha nga maka-“score” sa inyong mga hinigugma, human kamo sugta? Pakkk!
“Open relationship” na matud pay uso karon. Mao kini ang minubo sa komedya apan dalang tinuod nga binuang sa mga bugoy kaniadto: “collect, and collect, then select.” Sa open relationship, naay commitment sa usa’g-usa, apan mahimong muduwa og laing team. In other words, mahimong mutilaw og lain, kundili magpatilaw ang binuhat nga mao gyuy imong gihigugma ug maoy imong buot pakaslan. Naa koy mga kaila nga naay uyab, apan manguyab pa gyud og lain, unya kun imong sukmatan kabahin niini, mudayon og ingon nga “for fun ra man ni.” Nga matud pa si Maria gyud matud pay iyang kalibutan ug kinabuhi, samtang si Magdalena, kalingawan ug lumalabay lamang. Apan dili kay mga lalaki lang ang may ingon niana nga buhat, hasta pud ang mga babayi, labaw na ang mga bayot ug bisexual. Pwes, kinsay guilty? Pakkk!
Reaksyon o opinion? Text me pinaagi sa: 0939-131—6599. Kinahanglan nga dunay ngalan ug address ang mensahe, ug labaw sa tanan kabahin kini sa unsay gituki karong adlawa, dili pwede ug ayaw paghimo og laing topic. Plus, kung makig-text mi ra ka, ayaw na lang og text—wa koy panahon ana. Pakkk! Kutub lang karong ala una sa hapon, (1pm, August 30) ang pagdawat nato sa inyong mga reaksyon. Busa, text text text na!
Magdungog gihapon ta pinaagi sa dyRC 648 Khz, 10 a.m. to 12n—Lunes hangtud Sabado. Bisitaha mi sa www.dyrc-cebu.com. Pangitaa ko sa Facebook: Banathugyaw@yahoo.com