Julielmo's One Summer

CEBU, Philippines - Misamot kasuod sa tinuod nga kinabuhi ang mga bida sa pelikulang Just One Summer nga sila si Julie Anne San Jose ug Elmo Magalona apan giklaro sa duha nga kutob ra gyud sila sa panaghigalaay.

Ang duha mitikang dinhi sa Sugbo sa miaging adlaw alang sa promosyon sa maong pelikula ug nagpasalamat usab sila sa tanang nitan-aw niini ug sa samang higayon, isip celebrity guests sa kapistahan sa barangay Opao, dakbayan sa Mandaue.

Aminado ang duha nga nagkadungan ang pagpasalida sa Just One Summer sa pelikula sa Star Cinema nga The Reunion.

“Ang importante na ginagawa namin ang bagay na nakapapasaya sa fans namin. Matagal naming hinihintay ang movie na ito,” suma pa ni Julie Anne.

Matud pa ni Julie nga kapila na kahigayon nga na-move ang playdate sa maong pelikula gumikan kay duna may mga kakulian atol sa shooting ilabi na ang dagan sa panahon, sama sa kusog nga uwan.

Samtang si Elmo misaysay nga lahi ang tirada sa Just One Summer gumikan kay gawas sa love story, naghisgot usab kini og ubang butang kung diin makakuha og maayong pagtulun-an ang mga motan-aw niini.

“Sa pelikula kasi namin, iba yung approach, maraming moral lessons na makukuha tungkol sa relationship, family and friendship. Makikita po sa pelikula ang mga eksena na masasabi natin na dapat talaga na ang mga tao ang may respeto sa isat-isa,” matud pa ni Elmo.

Matud pa ni Elmo nga wala sila magdahom nga makaangkon gilayon og dako nga break, sanglit bag-ohay pa lang gyud misulbong ang ilang team-up nga namugna musical variety show nga Party Pilipinas sa GMA-7 matag Domingo.

“Lahat na aming makakaya ay ginagawa namin ni Julie para lang matutuwa po ang mga fans namin,’’ matud pa ni Elmo kinsa misaysay usab nga nagbaha ang mga positibo nga feedback nga iyang nadawat sukad gipasalida ang maong pelikula sa mga sinehan.

Samtang dili usab buot ni Elmo nga itandi ang iyang kaugalingon sa career sa iyang ate Maxene Magalona kinsa, nag-una kaniya sa showbiz, apan siya na hinuon ang natagaan og dako nga movie break.

“Nagkaroon naman siya (Maxene) ng maraming movie , bale dito sa Just One Summer, ay naka-focus ito sa loveteam namin,’’ matud pa ni Elmo.

Giklaro ni Elmo nga wala pa nila maabot ni Julie Anne ang labing taas nga istado sa ilang team-up ug daghan pa sila nga angayang nga buhaton.

“Hindi pa namin nare-reach yung peak, still improving pa naman hanggang ngayon. Kahit walang relationship, pero nag-click pa rin,” suma pa ni Elmo.

Samtang no comment lang si Elmo sa padayag sa iyang ate Maxene kinsa miuyon sa pre-marital sex.

“Opinyon niya yan, so wala akong masasabi,” matud pa ni Elmo.

Sa pikas bahin, si Julie Anne misaysay usab nga panagsa ra gyud sila magkauban ni Elmo sa pagpanuroy, apan ilaha gihapon nga gitagaan og importansya ang ilang panaghigalaay.

“Di ba, wala namang particular measure yung value ng friendship?,” tubag-pangutana ni Julie Anne.

Dugang pa sa aktres nga maghinatagay pud sila ni Elmo og regalo ilabi na atol sa ilang mga birthday.

Suma pa niya nga nakadawat siya og kuwentas gikan kang Elmo atol sa iyang birthday.

“Pero noong birthday naman ni Elmo, binigyan ko siya ng toy car. Kasi narinig ko na paborito daw niya ang toy car. So naisip ko na dagdagan ang collections niya,” suma pa ni Julie Anne.

Dugang pa ni Julie Anne nga dako kaayo og natabang ang Just One Summer sa pagpalambo sa ilang pag-arte gumikan kay gikauban gyud nila ang mga bug-at nga bituon sa showbiz sama nila ni Joel Torre, Alice Dixson, Cherie Pie Picache ug Gloria Romeo.

“Tinutulungan din ako ni acting coach Anna Felio at direk Mac (Alejandre),” matud pa ni Julie Anne.

RH BILL

Samtang supak si Julie Anne sa RH-Bill gumikan kay matud pa nahasupak kini balaod sa Ginoo. “Seguro marunong naman mag-isip ang mga tao sa mga bagay na makapabuti sa kanila. Lahat naman tayo may kanya-kanyang opinion,” suma pa ni Julie Anne.

Ang partner usab niya si Elmo miingon og, “Hindi ko talaga alam, seguro alam naman ng tao kung ano ang ginagawa niya.”

Wala usab mahulga si Julie Anne sa giingong pagbalhin ni Lauren Young sa tugkaran sa GMA-7.Ang maong aktres na-link kang Elmo.

“I really have nothing to do sa mga ganyan, it’s none of my business, seguro wala namang problema kung lilipat siya. Basta trabaho lang tayo,” suma pa ni Julie Anne.

Padayon pa nga gisalida sa mga sinehan lukop nasud ang “Just One Summer” ubos sa GMA Films.