CEBU, Philippines - Nahisgutan ang pangalan sa eight-division world champion nga si Manny Pacquiao sa bag-ong single sa international rapper nga si Pitbull.
Gawas sa boxing legend, nahisgutan usab sa awit sa maong rapper ang pipila usab ka sikat nga mga personalidad sama nila ni Muhammad Ali, Joe Frazer ug Tom Cruise. Sa bag-o niya nga single nga "Get It Started" gihulagway sa singer ang istorya sa iyang kinabuhi ug ang pagtikang niya sa nagkalain-laing lugar sa kalibutan. Sa ikatulo nga stanza sa kanta, gikumpara ni Pitbull ang iyang kaugalingon kang Pacman.
“Big news, Pitbull. Tom Cruise, Mumbai. All lit up like a December night, like the 4th of July, Vanilla Sky / Thrilla in Manilla, knockin' em out like Pacquiao. New Ali, new Frazier but for now it’s off to Malaysia,” tipik sa kanta ni Pitbull. Mao kini ang ikatulo nga collaboration nila ni Pitbull ug sa sikat nga singer nga si Shakira. Si Pitbull matud pa maoy nagsuwat sa lyrics sa kanta. Kahinumduman nga nag-concert si Pitbull dinhi sa Pilipinas sa miaging tuig. Pipila sa mga sikat nga awit ni Pitbull naglangkob sa "I Know You Want Me," "Krazy," "Hotel Room Service" ug uban pa.
Lubnganan ni FPJ gidugok
Gidugokan kagahapong adlawa sa mga fans ni anhing Fernando Poe. Jr. ang lubnganan sa aktor didto sa Manila North Cemetery. Ang aktor nagselebar sa iyang ika-73 ka tuig nga adlaw nga natawhan busa usa ka santos nga misa ang gihimo kagahapon nga gipangulohan ni Caloocan Bishop Deogracias Iñiguez Jr. ug gitambongan sa pipila ka inila nga mga personalidad sama nila ni Manila Mayor Alfredo Lim ug anak ni Da King nga si Movie and Television Review and Classification Board (MTRCB) chairperson Grace Poe-Llamanzares. Nipanaw ang aktor niadtong December 14, 2004 sa edad nga 65-anyos. Kahinumduman nga pormal nga gidawat sa pamilya ni Fernando ang posthumous national artist award gikan ni Presidente Noynoy Aquino. (Sanden J. Anadia)