Sigurado na lalaban uli sa boxing si Congressman Manny Pacquiao at mangyayari ‘yon sa Nov. 10.
Nakipag-meeting na si Papa Manny sa Top Rank promoter na si Bob Arum pero hindi pa sila pumipili ng makakalaban niya. Nasa listahan ng mga pinagpipilian ang pangalan nina Timothy Bradley at Juan Manuel Marquez.
Tumatagal ng dalawang buwan ang boxing training ni Papa Manny kapag may laban siya kaya tiyak na magsisimula sa susunod na buwan ang kanyang practice.
Van Damme fan ni Pacquiao
Nagkaedad na rin si Jean Claude Van Damme, ang international action star na nainterbyu ni Papa Ricky Lo para sa Startalk.
Kasama si Van Damme sa sequel ng The Expendables, ang pelikula na pinagbibidahan ng mga old action star na sina Sylvester Stallone, Arnold Schwarzenegger, etc.
Fifty two years old na pala si Van Damme na ex-boyfriend ni Jessica Rodriguez. Dumalaw noon sa Pilipinas si Van Damme at gusto niya uli na makabalik sa ating bansa.
Maraming kaibigan na Pinoy si Van Damme. May bahay siya sa Hong Kong at Pinoy ang arkitekto ng kanyang tirahan doon.
Hindi na bagets ang face ni Van Damme nang mainterbyu siya ni Papa Ricky. Ipinalabas sa Startalk noong Sabado ang exclusive interview kay Van Damme na fan pala ni Papa Manny Pacquiao. Ganyan kasikat ang ating Pambansang Kamao.
Bicol aliw na aliw sa pagdating ng Kapuso stars
Dumayo kahapon sa Bicol ang Kapuso stars dahil nakisaya sila sa Ibalong Festival sa Legazpi, Albay.
Live na napanood kahapon ang Party Pilipinas mula sa Legazpi City. Aliw na aliw ang mga Bikolano dahil nakita nila ng personal ang kanilang favorite Kapuso stars at ang mga bida sa primetime shows ng GMA 7. Sina Richard Gutierrez, Sarah Lahbati, Jennylyn Mercado, Alden Richard, at Mark Herras ang ilan sa Kapuso stars na nagpasaya kahapon sa mga kababayan natin sa Legaspi City.
Jessica at buong team nahanap ang ikinasal sa baha
Ang galing-galing ni Jessica Soho at ng staff ng Kapuso Mo, Jessica Soho dahil na-locate agad nila ang couple na nagpakasal habang nananalanta ang malakas na ulan at baha sa Metro Manila.
Instant celebrities ang magdyowa dahil sa wedding picture nila na kumalat sa Internet. Pinagpistahan ang litrato dahil nakalublob sa tubig baha ang newlyweds habang suot nila ang kanilang mga damit pangkasal.
AiAi magpapakasal uli sa beach sa December!
Hindi inakala ni AiAi delas Alas na magiging big news ang tsismis na nagpakasal sila sa Las Vegas, Nevada ng kanyang boyfriend na si Jed Alvin Salang.
Hindi kinumpirma pero lalong hindi idinenay ni AiAi ang tsismis. Tikom din ang bibig niya sa balita na magpapakasal sila ni Jed sa isang beach resort sa Dec. 8. No comment din si AiAi sa mga haka-haka na mag-oober da bakod siya sa ibang TV network pero inamin niya na hanggang sa December na lang ang exclusive contract niya sa ABS-CBN.