CEBU, Philippines - Hingpit na nga miduso sa iyang application para sa 2012 PBA Draft ang TV host nga si Chris Tiu kagahapon sa buntag.
Una niini, nagduha-duha si Chris sa pagsulod na sa professional basketball sanglit gipaabot na matud pa siya nga magkat-on kabahin sa ilang mga nagkadaiyang negosyo sanglit siya maoy mudumala niini sa umaabot. Sa interview sa PEP kagahapon kang Chris pinaagi sa telepono gitumbok ni Chris Tiu ang iyang dakong gugma sa basketball isip unang rason sa iyang hukom, ikaduha mao ang iya matud pa nga responsibilidad ngadto sa mga fans sa basketball ug ikatulo ang iyang gugma sa Ginoo.
Gitugtan pud matud pa siya sa iyang mga ginikanan. Dungan niini, gipalanog ni Chris nga tanang mga team sa PBA matud pa, gawas lang sa Air 21, ang mipakita og interes pagkuha niya. Apan bisan asa nga team matud pa siya mahaluna, ikalipay niya. Kanhi varsity si Chris sa Ateneo Blue Eagles sulod sa upat ka tuig hangtud sa iyang pag-graduate adtong 2008. Sa katapusan niyang tuig sa Blue Eagles sila maoy mi-champion sa University Athletic Association of the Philippines (UAAP). Miduwa pud siya alang sa Smart Gilas, national basketball team sulod sa tulo ka tuig.
Angelica ug Loydie nag-date, nag-holding hands
Human sa ilang pagpanghimakak, nasigpatan niining bag-o lang sila si Angelica Panganiban ug John Lloyd Cruz nga nag-dinner date suma pa sa tinubdan sa ABS-CBNnews.com.
Ang tinubdan, mibutyag nga sila si Loydie ug Angelica nag-dinner date sa Crazy Katsu, usa ka Japanese restaurant nga nahimutang sa Maginhawa Street sa Diliman, Quezon City, adtong Huwebes sa gabii.
Suma pa nga nag-holding hands pa gani ang duruha sa ilang pagpaingon na og sakay sa usa ka blue nga van. Adtong Hunyo, gihimakak ni Angelica nga may relasyon sila ni Loydie, rason niya mao nga managsama lamang sila nga naduslak ang kasingkasing human sa ilang tagsa-tagsa ka break-up.
Si Angelica ug Derek Ramsay nagbuwag pipila lang ka buwan ang milabay samtang si Loydie ug Shaina Magdayao napukan pud ang relasyon niining tuiga. Namahayag pud si Angelica nga dili pa siya andam og bag-ong relasyon.
Mark Kapuso gihapon
Subling mipirma og kontrata ang dramatic actor nga si Mark Anthony Fernandez sa GMA Network adtong Agosto 2. Mitambong sa contract signing sila si (from left) Dondon Monteverde (Mark's manager), Mark, GMA Chairman and CEO Atty. Felipe L. Gozon, GMA Entertainment TV's OIC Lilybeth G. Rasonable, ug Assistant Vice President for Entertainment TV Redgie Acuña-Magno. Kasamtangang makita sa top-rating serye Makapiling Kang Muli si Mark.