Lindsay na-ospital tungod sa car accident

CEBU, Philippines - Nalandig sa tambalanan ang Hollywood actress nga si Lindsay Lohan human nga usab kini nalambigit sa car accident didto sa California sa miaging adlaw. Suma pa sa report nga nibangga ang itom nga Porsche Panamera ni Lindsay ngadto sa usa ka silver Mustang car. Matud pa nga nangayo og sorry ngadto sa iyang nabanggaan ang lalaki nga kauban sa aktres ug nangatarongan kini nga gigukod sila sa mga paparazzi hinungdan nga gipaspasan nila ang pagpadagan sa sakyanan. Giingong gikan nag-shopping sa West Hollywood ang aktres sa wala pa nahitabo ang insidente.

Kahinumduman sa miaging buwan, nakabangga usab og dump truck sa Santa Monica, California ang nahisgutang sakyanan ni Lindsay.

Sugbuanong banda sikat sa Canada

Ang Sugbuanon nga banda nga gitawag og “The Juarez” mi-perform kagabii hangtud na sa sunod semana alang sa tinuig nga Alberta Summer Games didto sa Canada. Ang maong banda gilangkoban sa mga magsuong Juarez nga sila si Eugie & Eunie (16), Aiana (13) ug Mico (15).

Duha ka tuig na ang milabay human gi-feature dinhi sa Banat News Hugyaw ang maong banda. Suma pa sa iyaan sa maong mga bata nga si Dulcita Siroy nga nagbase na karon didto sa Canada ang maong banda sanglit didto na usab nagtrabaho ang mga ginikanan niini.

Giingong giidolo na ang maong banda didto sa Canada gumikan sa hugyaw nila nga talento sa musika.

Gipasigarbo pag-ayo ni Dulcita ang iyang mga pag-umangkon sanglit kini lang ang bugtong grupo sa Pinoy nga mo-perform sa maong dakong event sa Canada nga saksihan sa liboan ka mga tawo.