Dahil sa sunog, Shalani nilayasan ang dinner

Nagkita kami ng mag-asawang Congressman Roman Romulo at Valenzuela City Councilor Shalani Soledad sa isang dinner noong Sabado.

Nag-hi and hello lang ang mag-asawa dahil umalis agad sila. Ni hindi sila kumain dahil worried na worried si Shalani. Nagmamadali sila na nagpaalam dahil may sunog sa isang lugar sa Valenzuela City na kailangan niya na puntahan.

Ganyan ka-dedicated si Shalani bilang konsehala ng Valenzuela City. Iniiwan niya ang lahat ng mga ginagawa, kahit gaano ito kahalaga, kapag ang kapakanan ng kanyang constituents ang nakasalalay.

Kasama ni Shalani sa pagsugod sa Valenzuela si Papa Roman na very supportive sa lahat ng mga ginagawa ng kanyang misis.

Bela, one and only choice ng beauty clinic

Masipag ang PR ng Nisce na si Zsa Salazar dahil ipinadala niya sa akin ang press kit ng beauty clinic na ini-endorso ni Bela Padilla.

Si Bela ang bagong endorser ng Nisce Skin ‘N Face at ang sabi ni Marie Antoinette Nisce, si Bela ang kanilang one and only choice.

Si Dr. Edna Nisce ang chairwoman at chief dermatologist ng Nisce Skin ‘N Face.

Para sa kanya, hindi lamang pretty face si Bela dahil talented at matalino raw ang dalaga.

Pang-beauty queen ang height ni Bela pero hindi na siya magiging beauty queen dahil nag-pose na siya ng sexy sa FHM.                                            

Anak ni Erap na puwedeng-puwedeng artista, naghahanda nang pumasok sa sikat na university sa NY

Puwedeng artista ang anak ni Papa Erap Estrada na si Joma Ejercito pero wala sa vocabulary ng bagets ang pumasok sa showbiz.

May mga nagsasabi kay Joma na kahawig siya ni Richard Gutierrez pero kahit sikat na artista ang kanyang ama, mas gusto ni Joma na makatapos ng pag-aaral. High school graduate na si Joma at naghahanda na siya sa pagpasok sa isang sikat na university sa New York.

Kuhang-kuha ni Joma ang mannerisms ni Papa Erap dahil pareho ang kanilang birthday. Sabay na ipinagdiriwang ng mag-ama ang mga kaarawan nila tuwing April 19.

Ipe pumapatol sa contestant

Mga sikat at multi-awarded ang mga mentor ng mga contestant ng Protégé: The Battle for the Big Artista Break.

Masuwerte ang mga makakapasa sa audition ng talent search show ng GMA 7 dahil mabibigyan sila ng pagkakataon na maturuan sa pag-arte nina Phillip Salvador, Ricky Davao, Roderick Paulate, at Gina Alajar.

   Ipinapakita na ang teaser ng Protégé at marami ang naloka sa isang eksena dahil parang galit si Ipe nang sabihan nito na mayabang ang isang aspiring actor. May karapatan na maging mentor sina Ipe, Gina, Ricky, at Roderick dahil hindi matatawaran ang husay nila sa pag-arte. Mga professional at magagaling na artista na kagaya nila ang nagtatagal sa showbiz.

Eric naglalambing na patuloy na ipagdasal si Dolphy

Masaya si Eric Quizon nang maglambing ito sa mga tao na ipagpatuloy ang pagdarasal para sa kanilang ama dahil bumubuti ang kalagayan ni Mang Dolphy.

Kumbinsido si Eric na napakalaking tulong ang mga dasal na iniaalay ng mga tao para sa tatay niya.