MANILA, Philippines - Matapos manalo ng acting award, lalo pang nagiging seryoso si Paulo Avelino sa kanyang showbiz career.
Hindi nga gaanong pansin ni Paulo ang mga tawag sa kanya na One of the Sexiest Men in the Philippines at Next Big Star.
“Masaya ako sa lahat ng blessings na natatanggap ko. ’Di ko masyadong iniisip ’yung mga titulo kundi mas gusto kong pagbutihin ang craft ko,” sabi ni Paulo na napiling endorser ng Gran Matador Light ng Ginebra San Miguel, Inc.
Matapos siyang makilala bilang Nathan sa teleserye na Walang Hanggan ay nauna nang nagpunyagi si Paulo sa indie film na Sayaw ng Dalawang Kaliwang Paa at nanalo pa bilang best supporting actor sa 2012 PASADO Awards.
“Gusto kong gumawa ng mas marami pang independent films dahil marami kang matututunan,” ayon sa kanya.
Malaking bagay ito dahil may dalawa na siyang proyekto sa Regal Entertainment, Inc., kabilang dito ang isang romantic comedy.
Kaya’t labis niyang ikinatuwa ang pagiging endorser ng Gran Matador Light. Siyempre, isa yata sa mga pinakakilalang kumpanya sa bansa ang Ginebra San Miguel na gumagawa ng Gran Matador Light, na isa naman sa pinakabagong produkto nito.
Sa bago niyang commercial, nakasama ni Paulo ang magandang model na si Petra Dvorakova at singer ng Kenyo na si McCoy Fundales na siyang kumanta ng Gran Matador Light jingle na Gaan na Gusto Ko.
“’Di ko inaasahan na mapapasama sa mga Ginebra endorsers tulad nina Manny Pacquiao, Dingdong Dantes, at Anne Curtis. Gustung-gusto ko ito dahil umiinom talaga ako ng brandy,” wika ni Paulo.
“Base sa aming pag-aaral, bagay na bagay si Paolo sa Gran Matador Light. Hanga kami sa pagiging seryoso niya sa career niya at tiyak na magiging isa siya sa mga pinakamagaling na aktor sa mga darating na panahon,” sabi ng marketing manager na si Nelson Elises.
Pagdating naman sa mga gusto niyang makatrabaho, pangarap ni Paulo na makasama sa mga future projects sina Anne Curtis, Kim Chiu, at Sarah Geronimo. Hangang-hanga rin siya sa mga babaeng tulad nina Dawn Zulueta at Julia Montes.
“For me the sexiest thing about a woman is her brain. I find Dawn Zulueta and Julia Montes sexy. Parehong masarap kausap,” pahayag pa ng aktor.