MNNAOTW (Mao Na Ni All Over The World) mga Ka Tribung BisChikadora! Hugyaw nga Domingo kanatong tanan. Bugnaw kaayo ang panahon mintras ako kining gisuwat akong BisChika kay kusog kaayo ang uwan ug dugdog! Daghan na hinuon ko mahinumduman basta ing-ani ang panahon, (dili mga utang ha). Mga panahon nga ang inyong Yur’s truly hugyaw nga inlab pa sa usa ka nilalang pero bisag unsa paman ang nadangatan sa maong gugma, usa ra ang akong masulti: mapasalamaton ko nga kini akong nasinati kay mao kini nagpahimo nako nga mas lig-on pa kung gugma na ang hisgutan. Mao siguro nga sa kadugay na nga panahon, single and willing to mingle pa ang akong beauty. Hahahhaha! Pero wala ko nagdali kay para nako ang tanang bagyo nga niagi sa akong kinabuhi dunay bangaw. Dugay pa ang Valentines day pero tagai nalang ko ninyo og chance kay ga- emote ang inyong dakong butanding tungod aning uwan, kuwang nalang gani mugawas ko sa boarding house para mokanta ug “I’m singing in the rain “o di ba kaha kay “ pumapatak na naman ang ulan sa bubong ng bahay.” Usahay dili gyud nako malikayan nga magdrama basta mouwan kay ang uwan basta mao na to siya! Hahahaha!
Congratulations ug good luck sa atong mga manok sa bag-o lang nahuman nga audition sa reality show sa GMA 7 ang inyong Kapuso Network ang Protégé: The Biggest Artista Search! Sa unang adlaw sa audition daghan kaayong mga Sugbuanon ang sayo pa lang sa buntag naglinya gawas sa usa ka mall dire sa Sugbo para mag audition. Gani, full force kaayo ang suporta sa mga nag audition kay dunay nagbitbit og ginikanan, amigo, amiga, boyfriend, girlfriend, (bisan si Roxanne ang make up artist sa BuenaMano Balita ug Balitang Bisdak present kay ang iyang BF best in audition gyud!). Didto nanggawas ang mga emosyon sa ikaduhang adlaw ug atong angay atangan ang mga eksena sama nalang sa amahan nag way way ( yaw–yaw ) kay nganong iyang anak wala nasulod, dunay mag uyab nga ni audition, unsa man pagkahitaboa nga si girlfriend man ang pasok sa banga, ug uban pa. Naghinaut ang inyong BisChikadora nga kinsa man ang atong mamahimong manok sa kauluhan ihatag nato ang atong Bisdak support!
Kung kining atong mamahimong manok kay mamahimong artista hinaot nga dili intawon sila mag nilabad kay dako kaayo kining labad sa mga tawo nga nagpaluyo sa programa. Dili nalang nako isibya pero pipila na usab ka mga big stars, small star, falling stars ang akong nahimamat nga attitude problem, dunay mga dili ganahan mogawas kay dapat magpaulahi gyud, dunay gusto pud mag-una kay para mahuman na, dunay mga dili ganahan molugwa sa entablado kay dili lang nila feel, mas gusto nila nga hangyuon pa sila. Dili ka mahugyaw? Ug labaw sa tanan dili ninyo kalimtan ang mga tawo nga nakatabang ninyo. Bisan paman sa pag hi, hello, musta na you, ok lang me? Tagaan man ka og mensahe sa facebook ug very generic message sama nalang sa Hi there! Ang akong tubag? Walay itubag kay deadma ko.
Give your best sa bisag asa pa nga contest or audition. Nahugyaw ang usa sa mga gihatagan nako og tips (nangayo man) para mahatag nimo ang imong best performance dapat imong hunahunaon nga ugma mamatay na ka! Mao nga ang tanan imo nang ihatag! Ug labaw sa tanan gikan sa usa sa akong mga mentors iya kung giingnan sa kining trabaho sa industriya sa kalingawan kay “ you will be remembered with your last performance. “ Mao nga ang Good Morning Butanding Dance akong gihatag ang tanan sa pag ikid-ikid! Hahahaha! Lami ra ang segue? Bitaw, Salamat pag usab sa tanang ni suporta sa GoodMorning Butanding Dance nako sa BuenaMano Balita. Para sa gusto magpakita sa inyong own version sa GMBD (GoodMorning Butanding Dance) pwede ko ninyo i- tag sa Facebook: yoriestorm@yahoo.com para mapakita nato kini all over the world! Hangyo lang usab nako sa mga nagchat nako sa FB kung dili ko makalahutay og chat ninyo, kana mao nga duna ako’y gihuman nga trabaho. Pero akong buhaton ang tanan nga matubag ko kamo. Mao nga Mao na ni all over the world!