Kadaugan ni Marriam

CEBU, Philippines - Gipasidunggan sa GMA Network ang mga pinili nga tinun-an nga migradwar karong tuiga sa kolehiyo nga mikuha og broadcast-related courses gumikan sa maayong performance nila sa ilang pagtungha.

Dinhi sa Sugbo, ang Cum Laude sa University of the Philippines-Cebu nga si Marriam Jaustine Reyes Sollano maoy migawas nga mananaug human usab sa higpit nga panagtigi.

Si Sollano, kinsa nahimugso didto sa Riyadh K.S.A, apan kansang amahan lumad nga taga Borbon, Cebu, miasoy nga dili lalim ang pagkab-ot niya sa maong pasidungog sanglit gipaubos siya sa panel interview ug napili siya pinaagi sa criteria nga gilangkoban sa scholastic achievement, related work, ug personal background.

Dili malimod nga utukan gayud si Sollano, sanglit sa pagtapus niya og high school didto sa International Philippine School didto sa Al-Khobar, nakadawat siya og special award.

Diha sa UP Cebu, College Scholar siya gikan sa 2008 hangtud sa 2011, ug karong tuiga gipasidunggan siya isip University Scholar ug Outstanding Mass Communication Student.

Nagkanayon ang 21-anyos nga si Sollano nga kung matagaan siya og tsansa nga makatrabaho sa GMA, dili siya magduha-duha sa pagdawat niini kini kung mahaom sa iyang hilig, ug usa na niini mao malakip sa bisan unsa nga documentary shows sa Kapuso.

Usa sa paborito niya nga documentary show sa GMA mao ang I-Witness gumikan kay gitutukan gyud niini ang istorya sa bisan-unsa nga sektor sa katilingban.

Matud pa niya nga pinaagi sa usa ka documentary show, madungog sa katawhan ang yangungo sa masa sama sa mangingisda, mag-uuma ug uban pa nga sektor nga kinahanglan nga tagaan og pagtagad sa kagamhanan.

Suma pa ni Marriam gipasigarbo niya nga ang titulo nga Cum Laude sanglit bunga kini sa iyang paningkamot nga magtuon ug paghatag og balanse sa oras.

“Importante man gyud nga magtuon og maayo, pero mohatag sad gyud ka og time sa paglingaw-lingaw sa imong self. Sa amoa, aron ko malingaw, mag-watch ra gyud ko og movies ug mag-surf sa net,” matud pa ni Marriam.

Usa sa technique ni Marriam sa iyang kalamposan mao nga i-enjoy ang pag-eskwela ug paggahin og igong oras sa pagtuon.

“I-enjoy lang gyud, ayaw huna-hunaa permi ang grado aron dili ka ma-pressure,” suma pa ni Marriam.

Aktibo si Marriam sa nagkadaiya nga kahugpungan, kini sama sa Queen City Toastmaster Club kung diin siya maoy kasamtangang secretary. Miyembro usab siya SA UP Tsinelas, diin ang tumong niini mao ang pagtabang sa mga kabus nga kabataan sa Sugbo.

Matud pa niya nga makatabang ang pagsalmOt og mga pundOk sanglit daghan kaayo og makat-onan ug sa samang higayon, makabaton pa gyud og daghang higala.

Gawas nga dunay makat-unan, daghan usab ang matabangan ug dinhi mupatigbabaw ang kooperasyon sa usa’g-usa.

Nasayran nga ubay-ubay na nga mga awardees ug finalists sa maong panagtigi ang karon nagtrabaho na sa GMA ug kini naglangkob sa news reporters nga sila si Dano Tingcungco, Jam Sesante, ug Micaela Papa; GMA News online reporter Kimberly Jane Tan, Saksi segment producer Sophia Balod ug GMA Cebu sales producer Rachel Sindo.